Dúnıejúzilik kóshpendiler oıyndary: «Birlik kerýeni» Jambyl oblysynan bastaldy
ASTANA. KAZINFORM - 5-shi Dúnıejúzilik kóshpendiler oıyndarynyń bastalýyna 2 aı ýaqyt qaldy. Dúnıejúzilik kóshpendiler oıyndarynda sport jarystarynan bólek mádenı ári ǵylymı baǵdarlamalar da qolǵa alynǵan.
Jyldyń eń mańyzdy oqıǵasy sanalatyn Oıyndardy qoldaýǵa jáne jobany halyq arasynda nasıhattaý maqsatynda mádenı baǵdarlama aıasynda Jambyl oblysynda «Birlik Kerýeni» atty aımaqtyq úlken joba bastaldy.
Jambyl oblysy Qordaı aýdanynyń Noǵaıbaı aýylynda, Yrǵaıty ózeniniń jaǵalaýynda «Birlik kerýeni» barysynda ulttyq naqyshtarmen jasalǵan etnoaýyl qurylyp, 6 kıiz úı tigildi. Ár kıiz úı ózindik ereksheligimen taqyrybyna saı bezendirildi. Etnoaýylda qazaqtyń salt-dástúrleriniń kórinisi, tarıhı jádigerler kórmesi, aýdannan shyqqan tanymal tulǵalardyń kitap kórmesi, ulttyq oıyndar, kóshpeli jabdyqtar kórmesi ótti.
«Búgingi uıymdastyrylyp otyrǵan shara halqymyzdyń mádenı murasyn, onyń ishinde ulttyq qundylyqtar men ulttyq oıyndaryn nasıhattaýda, Qazaqstan halqynyń baı tarıhy men mádenıetin tanystyrýda, halyqtyń birligin, yntymaǵyn arttyrýda mańyzy zor. Bul – ata-babamyzdyń turmys-saltyn, jalpy bolmysyn pash etetin erekshe mádenıet orny boldy, desek qatelespeımiz. Qordaı aýdany yntymaǵy jarasqan, turaqtylyqty tý etken qasıetti meken. Elordada ótetin kóshpendiler oıynyn da joǵary deńgeıde ótkizip, birliktiń úlgisin kórsetemiz degen senimdemin», - dep pikir bildirdi ardager sportshy Myqtybek Altybaı.
Uıymdastyrýshylar qazaq kúresi, aýdaryspaq, sadaq atý, toǵyzqumalaq, asyq atý, arqan tartý sekildi ulttyq oıyndardan jarystar ótkizdi.
Qonaqtar ulttyq taǵamdar festıvalinde dám tatsa, sahna alańynda qazaqtyń ulttyq ánderi men bılerinen kontserttik baǵdarlama uıymdastyryldy.
Jambyl oblysynyń mádenıet qaıratkerleri bastaǵan «Birlik kerýeni» jobasy elimizdiń barlyq aımaǵynda uıymdastyrylady. Kóshpendiler mádenıetiniń negizinde qurylǵan «Birlik Kerýeni» 5-shi Dúnıejúzilik kóshpendiler oıyndaryn respýblıka kóleminde sezinýge múmkindik beredi.
