Dúnıejúzilik EXPO-2025 kórmesinde Astananyń týrıstik áleýeti kórsetildi
ASTANA. KAZINFORM – Dúnıejúzilik EXPO-2025 kórmesindegi 10 tamyz kúni Osaka qalasyndaǵy basty sımvol – kıiz úı boldy. Bul kóshpeli halyqtyń baspanasy, otbasy jáne turmys-tirshiliginiń beınesi. Qazaqstan kúnderi aıasynda Astana ákimdigi qalanyń týrıstik áleýetin tanystyryp, onyń halyqaralyq arenadaǵy ımıdjin nyǵaıtýdy jáne tanymaldyǵyn arttyrýdy maqsat etti, dep habarlaıdy elorda ákimdiginiń resmı saıty.
– Biz kıiz úıdi tolyqtaı, dala ómiriniń dástúrlerin, estetıkasy men fılosofııasyn sińirgen tiri keńistik retinde ákeldik, - dep atap ótti Astana qalasynyń Investıtsııalar jáne kásipkerlikti damytý basqarmasynyń basshysy Halel Ákimjanov.
Kún ishinde sýretshi Rınat Ábdirahmanovtyń týǵan shańyraǵynyń taqtaılarynan jınalǵan «Estelik osi» músinimen art-performans ótti. Nysan dástúr men tsıfrlyq bolashaq arasyndaǵy ósý núktesi retinde beınelenedi.
Dala brendi Samal toptamasyn usyndy. Bul – qazaq estetıkasynyń zamanaýı ınterpretatsııasy. Jeńil pishinder, tabıǵı matalar jáne dalanyń tabıǵı tústeri mádenıetti stıl men pishin arqyly kúndelikti ómirdiń bóligine aınaldyrady.
EXPO úshin arnaıy jasalǵan biregeı art-obektiler:
«Shańyraq» kınetıkalyq ınstallıatsııasy – ishki tirektiń sımvoly. Qozǵalmaıtyn ortalyq jáne onyń aınalasynda terbeletin sheńberler ózgermeli álemdegi tepe-teńdik pen turaqtylyqty bildiredi.
«Dastarqan» – aǵashtan oıylǵan ınstallıatsııa, ondaǵy aınalatyn sheńberler ómir aǵashyn beıneleıtin órnek quraıdy. Bul qonaqjaılyqtyń, dıalogtyń jáne urpaqtar birliginiń beınesi. Avtory – Anýar Shaımerdenov.
«Qarlyǵash uıasy» – áıel kúshi men qamqorlyǵy jaıynda. Ushyp bara jatqan qarlyǵashtar, uıa jáne ortasyndaǵy shańyraq estelik, sabaqtastyq jáne sheksiz qozǵalystyń metaforasyn kórsetedi.
Eske sala keteıik, buǵan deıin qazaq tazylary Helsınkıdegi Dúnıejúzilik ıtter kórmesinde álemge tanystyrylǵanyn jazǵan edik.