Dúnıejúzilik dopıngke qarsy agenttik 2027 jylǵy kongresin Astanada ótkizbek
ASTANA. KAZINFORM - Týrızm jáne sport mınıstrligi dopıngke qarsy halyqaralyq standarttardy tolyq engizip, taza sport qaǵıdattaryn júıeli túrde damytyp keledi. Bul baǵyttaǵy negizgi basymdyqtar – dopıngke qarsy tıimdi saıasat júrgizý, sportshylardyń densaýlyǵyn qorǵaý jáne ádil básekeni qamtamasyz etý, dep habarlaıdy QR Týrızm jáne sport mınıstrliginiń baspasóz qyzmeti.
Mınıstrlik dopıngke qarsy erejelerdi buzýǵa qatysty nóldik tózimdilik qaǵıdatyn ustanady. Qazaqstannyń Dopıngke qarsy ulttyq ortalyǵy Dúnıejúzilik antıdopıng erejesin buzǵan sportshylar týraly aqparatty jarııalaýy ashyqtyqty qamtamasyz etý, aıqyndyqty saqtaý jáne halyqaralyq mindettemelerdi oryndaý saıasatynyń bir bóligi. Dopıngke qarsy ulttyq ortalyqtyń júıeli jumysy dopıngke qatysty buzýshylyqtardy der kezinde anyqtap, sportshylardyń halyqaralyq jarystarǵa qatysýyna jol bermeıdi. Bul óz kezeginde Qazaqstannyń sporttyq bedelin halyqaralyq deńgeıde nyǵaıtýǵa yqpal etedi.
Bıyl naýryz aıynda jeńil atletıkadan jabyq keshendegi álem chempıonaty aıasynda Týrızm jáne sport mınıstri Erbol Myrzabosynov pen WADA prezıdenti Vıtold Banka ózara túsinistik týraly memorandýmǵa qol qoıdy. Qujat bilim berý, dopıngtiń aldyn alý jáne ǵylymı zertteýler baǵyttaryndaǵy birlesken jumysty keńeıtýge baǵyttalǵan.
-Qazaqstan Ortalyq Azııa óńirinde taza sportty damytýda mańyzdy ról atqarady, – dep atap ótti WADA Prezıdenti Vıtold Banka.
Sondaı-aq ol Qazaqstannyń antıdopıng mádenıetin damytýǵa jáne halyqaralyq yntymaqtastyqty nyǵaıtýǵa qosqan úlesin joǵary baǵalady.
Kezdesý barysynda taraptar 2027 jyly Astanada WADA Atqarýshy komıteti men Quryltaı keńesiniń otyrystaryn ótkizý múmkindigin talqylady. Mundaı deńgeıdegi is-sharalardyń Qazaqstanda ótýi eldiń antıdopıng saıasatyndaǵy júıeli jumystyń nátıjesi retinde qarastyrylady.
Búginde Qazaqstan álemdik sporttaǵy ádildik, ashyqtyq jáne adal básekelestik qaǵıdattaryn dáıekti túrde qoldaıtyn senimdi halyqaralyq áriptes retindegi rólin nyǵaıtyp keledi. Sonymen qatar sportshylar, jattyqtyrýshylar jáne sala mamandary arasynda dopıngtiń aldyn alý men bilim berý jumystaryna erekshe kóńil bólinip keledi.
Osyǵan deıin WADA-nyń Qazaqstannyń dopıngke qarsy zerthanasyna akkredıtatsııasyn qaıtarýy múmkin ekeni týrly jazdyq.
