Dúnıejúzilik bankten alynǵan qaryz: joba Qazaqstannyń jeti qalasynda iske asady
ASTANA. KAZINFORM — Úkimet úıinde vıtse-premer Qanat Bozymbaev Dúnıejúzilik bank delegatsııasymen kezdesti. Kezdesýde «Energetıka jáne kommýnaldyq sektorlardy jańǵyrtý» ulttyq jobasyn júzege asyrýdyń kelesi kezeńderi men tikeleı sheteldik ınvestıtsııalardy tartýda banktiń atqaratyn róli talqylandy. Bul týraly Úkimet málim etti.
Kelissózder barysynda Dúnıejúzilik bank ókilderi qoljetimdi nesıeleý quraldaryn, qarjylandyrý sharttary men paıyzdyq mólsherlemelerin usyndy. Al «Báıterek» Ulttyq basqarýshy holdıngi» AQ tıisti memlekettik organdarmen birlesip, negizgi sektorlar boıynsha 2029 jylǵa deıingi jobalar pýlyn jasaqtaý ústinde. Bul jobalar tizimi jan-jaqty taldaý jáne kelisý úshin Dúnıejúzilik bankke joldanady.
Sondaı-aq sýmen jabdyqtaý jáne sý burý júıelerin damytý salasyndaǵy áriptestik perspektıvalary da qaraldy.
— Elimizdegi birqatar iri sý arnasyna keshendi taldaý júrgizilip, Sýmen jabdyqtaý jáne sý burý qyzmetterin damytý jónindegi jol kartasy ázirlendi. Dúnıejúzilik banktiń qarajatyn gıdravlıkalyq júıelerdi ornatýǵa, sý arnalaryn avtomattandyrý jáne tsıfrlandyrýǵa baǵyttaý josparlanýda. Bank nesıesi esebinen alǵashqy jobalar Astana, Aqtaý, Petropavl, Taldyqorǵan, Saryaǵash, Tekeli jáne Qosshy qalalarynda júzege asyrylatyn bolady, — delingen habarlamada.
Aldaǵy kezeńde melıoratsııa júıelerin, sondaı-aq jylý jáne energetıkalyq jelilerdi jańǵyrtý boıynsha taǵy eki jol kartasyn ázirleý kózdelgen.
Kezdesý sońynda Qanat Bozymbaev elimizdiń strategııalyq mańyzy bar ınfraqurylym nysandaryn jańǵyrtý jumystaryna belsendi atsalysýǵa daıyn ekeni úshin Dúnıejúzilik bank tobyna alǵysyn bildirdi.
Eske sala keteıik, Dúnıejúzilik bank Sırııany qalpyna keltirýge shamamen 216 mlrd dollar ketetinin málimdegen bolatyn.