Dúnıejúzilik bankpen kelisimdi ratıfıkatsııalaý memlekettik qaryzdyń ulǵaıýyna jol bermeıdi

ASTANA. KAZINFORM — Dúnıejúzilik bankpen negizdemelik kelisimdi ratıfıkatsııalaý memlekettik qaryzdyń odan ary ulǵaıýyna jol bermeıdi. Bul týraly Májilistiń jalpy otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın aıtty.

Aıta keteıik, palata otyrysynda «Bir taraptan Qazaqstan Respýblıkasynyń Úkimeti jáne ekinshi taraptan Halyqaralyq Qaıta Qurý jáne Damý Banki, Halyqaralyq Qarjy Korporatsııasy men Investıtsııalar Kepildiginiń Kópjaqty Agenttigi arasyndaǵy Qazaqstan Respýblıkasynyń ornyqty damýyna jáne órkendeýine járdemdesý maqsatynda yntymaqtastyqty keńeıtý jónindegi áriptestik týraly negizdemelik kelisimdi ratıfıkatsııalaý týraly» Zań qabyldanǵan edi. Osy oraıda depýtat Samat Nurtaza buryn naqty jobalar boıynsha Úkimet pen Dúnıejúzilik bank arasyndaǵy jekelegen halyqaralyq sharttar ǵana ratıfıkatsııalanatyn eske saldy.

— Bul rette negizdemelik kelisimder ratıfıkatsııalaýǵa jatpaıdy. Óıtkeni, jobalardy iske asyrý kezinde ulttyq zańnamany ǵana qoldandyq. Osyǵan baılanysty nelikten qazir osy kelisimdi ratıfıkatsııalaý qajettiligi týyndady?, — dep surady ol Serik Jumanǵarınnen.

Vıtse-premer rasynda «Qazaqstan Respýblıkasynyń halyqaralyq sharttar týraly» Zańyna sáıkes, memlekettik qaryzdar týraly barlyq shart ratıfıkatsııalaýǵa jatatynyn atap ótti.

— Biraq, biz endi Dúnıejúzilik banktiń erejeleri men saıasatyn qoldanatyn bolamyz. Ol birinshiden búkil protsesterdiń tıimdiligin kóterýge baǵyttalǵan. Ekinshiden, memlekettik kepildikterdi memlekettik emes uıymdarǵa berýdi maqsat tutyp otyrmyz. Ol osy kelisim ishinde jazylǵan. Ol memlekettik qarjyny saqtaýǵa, basqa salalarǵa jumsaýǵa múmkindik beredi. Úshinshiden, memlekettik qaryzdyń odan ary ulǵaıýyna jol bermeıdi, — dedi Serik Jumanǵarın.

Osyǵan deıin mınıstr Jumanǵarın elde ekonomıkalyq ósimniń proaktıvti saıasaty eniziletinin aıtty.