Dúnıejúzilik bank toby qandaı jobalarǵa qarjy salady

ASTANA. KAZINFORM — Búgin Májilistiń jalpy otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın Dúnıejúzilik bank toby elimizde qandaı jobalarǵa qarjy salatynyn aıtty.

Palata otyrysynda depýtat Qaırat Balabıev Dúnıejúzilik bank tobymen yntymaqtastyq aıasynda elimizde 8 mlrd dollardy quraıtyn 50-den astam joba iske asyrylǵanyn aıtty.

— Atap aıtqanda, kólik, bilim berý, qarjy júıesi, jasyl tehnologııalar, ekologııa, sondaı-aq tsıfrlandyrý salalarynda. Meniń naqtylaǵym keletini, aldaǵy 2-3 jylda áleýetti qorjyn boıynsha qandaı boljam? Qandaı jobalar jáne ekonomıkanyń qandaı sektorlarynda josparlanyp otyr?, — dep surady depýtat Serik Jumanǵarınnen.

Vıtse-premer dereginshe, Dúnıejúzilik bank toby Qazaqstannyń ınklıýzıvti ekonomıkasy úshin jedel tsıfrlandyrý jobasyna 84 mln dollar salady. Ol Úkimettiń qaryzy sanalady. Munan bólek, Jezqazǵan-Qaraǵandy jolyna 1,2 trln teńge, al Beıneý-Sekseýl jolyna 750 mln dollar quıady. Jobalar paıdalanýǵa berilgennen keıin jolda júrý ýaqytynyń qysqarýy nátıjesinde ekonomıkalyq paıdasy 93 mlrd teńgeden asýy múmkin. Qurylys barysynda 13 myńnan astam jańa jumys orny qurylady.

— Munan bólek, ınnovatsııany yntalandyrý jobasyna — 75 mln dollar, Soltústik Aral teńizin qalpyna keltirýge — 100 mln dollar, sýarý jáne drenaj júıelerin jetildirýge — 300 mln dollar, temir jol qatynasyn jáne kólik baılanystylyǵyn transformatsııalaý jobasyna 850 mln dollar, Kommýnaldyq jáne energetıkalyq ınfraqurylymdy damytýǵa — 350 mln dollar, Qambar ata-1 GES-in salý jobasyna 500 mln dollar kózdeledi. Osy jobalardyń bárin kelisim ratıfıkatsııalanǵan keıin iske asyrýǵa múmkindik bolady, — dedi Serik Jumanǵarın.

Buǵan deıin Dúnıejúzilik bankpen negizdemelik kelisimdi ratıfıkatsııalaý memlekettik qaryzdyń odan ary ulǵaıýyna jol bermeıtinin jazǵan edik.