Dúnıejúzilik bank Ózbekstanǵa 800 mıllıon dollar kóleminde nesıe beredi
Dúnıejúzilik banktiń baspasóz qyzmetiniń habarlaýynsha, Dúnıejúzilik banktiń atqarýshy dırektorlar keńesi Ózbekstandaǵy damý saıasatyn qoldaý operatsııasyn maquldady, dep habarlaıdy Kazinform UzA agenttigine silteme jasap.
Operatsııanyń bul túri dúnıe júziniń ártúrli elderindegi áleýmettik-ekonomıkalyq reformalardy qoldaýǵa baǵyttalǵan Dúnıejúzilik banktiń arnaıy qarjy quraly sanalady.
Operatsııa el úkimetine áleýmettik, ekonomıkalyq jáne klımattyq ózgerister sektorlarynda reformalardyń jańa kezeńin júzege asyrý úshin qarjylyq qoldaý kórsetedi.
Dúnıejúzilik banktiń jańa operatsııasy aýyl sharýashylyǵy, temirjol, hımııa ónerkásibi jáne energetıka sııaqty negizgi sektorlardaǵy memlekettik baqylaýdy azaıtýdy qoldaýǵa baǵyttalǵan. Qabyldanǵan sharalar jeke sektordyń osy salalardy damytýǵa belsendirek qatysýyna múmkindik beredi. Sondaı-aq bul operatsııa áleýmettik qorǵaýdy qajet etetin halyqty áleýmettik-quqyqtyq qorǵaýdy kúsheıtýge jáne klımattyń ózgerýi men qorshaǵan ortany qorǵaýǵa baılanysty problemalardyń sheshimin tabýǵa kómektesedi.
Operatsııa aıasynda Dúnıejúzilik bank úkimetke arnaıy jeńildikti sharttarmen 800 mıllıon AQSh dollary kóleminde nesıe túrinde qarjylyq kómek kórsetedi. Bul qarajat úkimetke qazirgi ýaqytta halyqaralyq qarjy naryqtarynda bar qaryz alý nusqalaryna qaraǵanda tómen paıyzdyq mólsherlememen jáne uzaq merzimge beriledi. Osynyń nátıjesinde Ózbekstan úshin nesıelerdi óteý shyǵyndary aıtarlyqtaı qysqarady.
