Dúnıejúzilik bank Ózbekstanǵa $50 mln jeńildetilgen nesıe beredi

Dúnıejúzilik banktiń atqarýshy dırektorlar keńesi «Ózbekstandaǵy tsıfrlyq ınklıýzııa» jobasyn júzege asyrý maqsatynda $50 mıllıon kóleminde jeńildetilgen nesıeni bekitti. Kazinform bul týraly Dúnıejúzilik banktiń saıtyna silteme jasap habarlaıdy.

Joba úkimettiń ekonomıkany tsıfrlyq damytýyn qoldap, aýyl men shalǵaı aýdandardaǵy myńdaǵan jastyń tsıfrlyq tehnologııalarmen jumys isteý qabiletin arttyryp, aqparattyq tehnologııaǵa negizdelgen qyzmet kórsetý salalarynda (ITES-qyzmet) jumysqa turýǵa kómektesedi.

- Dúnıejúzilik bank qoldaıtyn jańa joba Ózbekstanǵa ekonomıkalyq ósim, jumys oryndaryn qurý jáne sheteldik ınvestorlardy tartýǵa ITES-qyzmet sektoryn paıdalanýǵa múmkindik beredi. Ony Tsıfrlyq tehnologııalar mınıstrligi janyndaǵy IT-Park aýyl men eldiń shalǵaı aýdandarynda turatyn 30 jasqa deıingi myńdaǵan jasty oqytý maqsatynda júzege asyrady. Joba aıasynda osy azamattardy jumysqa alǵan ITES-kompanııalar túrli jolmen yntalandyrylyp otyrady», - dep atap ótti Dúnıejúzilik banktiń Ózbekstandaǵy ókildiginiń basshysy Marko Mantovanellı.

2029 jyly joba aıaqtalatyn ýaqytqa qaraı, boljam boıynsha, Ózbekstannyń ITES-qyzmet sektorynda 25 myńǵa jýyq adam jumyspen qamtylady jáne 15 myńdaı turǵynnyń uqsas salalarda jumys isteýge múmkindigi bolady. Joba osy maqsatqa túrli is-shara arqyly jetýdi kózdeıdi. Onyń ishinde mynalar bar:

- elde zamanaýı keńselerdi usynatyn óńirlik 11 ITES-ortalyq qyzmetin iske qosý;

- 6200 jasqa, onyń ishinde 3100 áıel men 250 múgedektigi bar adamǵa negizgi kásibı daǵdylardy damytý baǵdarlamalaryn oqytý;

- ITES-kompanııalarǵa qyzyǵýshylyǵy bar 9000 jasty, onyń ishinde 4500 áıel men 360 múgedek adamdy jumyspen qamtý;

- Ózbekstandaǵy sheteldik jáne jergilikti ITES-kompanııalardyń qyzmetine jaǵdaı jasaý úshin qajet normatıvtik-quqyqtyq qujattardy daıyndaý.

Joba is-sharalarynyń arqasynda 240-qa jýyq jańa ITES-kompanııa IT-Park rezıdenti atanyp, Ózbekstandaǵy operatsııalyq qyzmetin bastaıdy.