Dúnıejúzilik bank Orta dálizge 7,6 mlrd dollar ınvestıtsııa salýdy josparlap otyr
ASTANA. KAZINFORM- TRACECA Úkimetaralyq komıssııasynyń 18-otyrysynda Dúnıejúzilik banktiń Ortalyq Azııa boıynsha ınfraqurylym jónindegi jetekshi mamany Vınnı Van Transkaspıı halyqaralyq kólik baǵytyn damytýǵa qatysty josparlarymen bólisti.
Onyń aıtýynsha, qazirgi jahandyq jaǵdaıda avtomattandyrylǵan ári turaqty kólik dálizin qalyptastyrýdyń mańyzy artyp otyr.
- Barlyq mınıstr men ókilder kólik dálizin ekonomıkalyq dálizge aınaldyrýdyń mańyzyn atap ótti. Bul dáliz boıyndaǵy elderdiń ekonomıkalyq ósimin qoldaýǵa múmkindik beredi, – dedi Vınnı Van.
Ol Dúnıejúzilik bank toby Transkaspıı kólik dálizin damytý úshin keshendi tásil qoldanatynyn aıtty.
- Biz tek ınfraqurylymdyq ınvestıtsııalarmen shektelmeımiz. Sonymen qatar avtomobıl jáne temirjol salasyndaǵy memlekettik kásiporyndardy reformalaý, operatsııalyq tıimdilikti arttyrý jáne óńirlik úılestirý baǵytynda jumys istep jatyrmyz, – dedi sarapshy.
Vınnı Vannyń málimetinshe, aldaǵy bes jylda Dúnıejúzilik bank toby Orta dáliz jobalaryna taǵy 7,6 mlrd dollar ınvestıtsııa salýdy kózdep otyr.
- Qazirdiń ózinde birneshe mıllıard dollar ınvestıtsııalanǵan. Kelesi bes jylda taǵy 7,6 mlrd dollar kólemindegi ınvestıtsııa qarastyrylyp otyr. Sonymen birge qosymsha 13,4 mlrd dollar tartý josparlanǵan, – dedi ol.
Spıker Dúnıejúzilik bank Orta dáliz boıynsha jańa strategııalyq esep ázirlep jatqanyn da jetkizdi.
- Jańa esepte saýda aǵyndary, ınfraqurylymdyq olqylyqtar, qarjylandyrý qajettiligi, ınstıtýtsıonaldyq reformalar men klımattyq turaqtylyq máseleleri qamtylady, – dep qorytyndylady Vınnı Van.
Buǵan deıin TRACECA tsıfrlyq dálizdi damytýǵa basymdyq berip otyrǵanyn jazǵanbyz.
