Dúnıejúzilik bank Marokkoǵa zeınet jasynyń shegin kóterýdi usyndy

ASTANA. KAZINFORM — Dúnıejúzilik bank Marokkoǵa zeınetkerlik jasty 70 jasqa deıin kóterýdi usyndy. Usynys eldegi halyqtyń qartaıýy zeınetaqy qorlaryna jáne memlekettik qarjyǵa eleýli qaýip tóndiredi degen ýájben negizdelgen, dep jazady AZERTADJ.

Akhbarona elektrondy gazeti habarlaǵandaı, Dúnıejúzilik banktiń esebinde egde jastaǵy adamdardyń demografııalyq júktemesiniń koeffıtsıenti 2020 jylǵy 11%-dan 2050 jylǵa qaraı 26%-dan asyp túsetini kórsetilgen. Bul jaǵdaı eger shuǵyl reformalar, ásirese zeınet jasyn ulǵaıtý jáne egde jastaǵy adamdardyń eńbekke aralasýyn yntalandyrý qolǵa alynbasa, áleýmettik jáne ekonomıkalyq daǵdarystarǵa ákelýi múmkin.

Alaıda bul usynys Marokkoda keńinen synǵa ushyrady. Jumysshylar men kásipodaq ókilderi bul bastamany eńbekkerlerdiń quqyqtaryna tikeleı qol suǵý dep baǵalady.

Sol baıandamada aıtylǵandaı, marokkolyqtar 55 jastan bastap júrek aýrýlary men qant dıabeti sekildi sozylmaly dertterge jıi shaldyǵady. Sondyqtan zeınet jasyna jetkennen keıin de jumys isteý olardyń densaýlyǵy men ómirine aıtarlyqtaı qaýip tóndiredi.

Dúnıejúzilik bank óz usynysyn ekonomıkalyq qajettilikpen túsindirgenimen, synshylar ony «áleýmettik jetistikterdi joıý» jáne qoǵamdyq turaqtylyqqa qaýip tóndirý dep baǵalap otyr.

Budan buryn Marokko 7,2 mıllıon týrıst qabyldap, jańa rekord ornatqanyn jazǵan edik.

Sonymen qatar jaqynda Marokkonyń Tıngır provıntsııasynan altyn qoryna baı jańa aýmaq tabyldy.