Dúnıejúzilik bank klımattyq jobalardy qarjylandyrýǵa qatysty 45% talabynan bas tartty
ASTANA. KAZINFORM – Dúnıejúzilik bank toby klımattyń ózgerýimen kúreske baǵyttalǵan jobalarǵa qarjy bólýdiń 45 paıyzdyq mejesinen bas tartty. Bul týraly uıymnyń jańartylǵan Klımattyń ózgerýi jónindegi is-qımyl josparynda aıtylǵan, dep habarlaıdy Kazinform agenttiginiń menshikti tilshisi.
Qujatta Dúnıejúzilik banktiń klımat salasyndaǵy jumysy budan bylaı da múshe elderdiń suranysy men qajettiligine negizdeletini atap ótilgen. Uıym memleketterge ulttyq josparlarynda belgilengen maqsattardy iske asyrýǵa qoldaý kórsetýdi jalǵastyrady.
-Biz klımatqa qatysty qosymsha tıimdilikke (climate co-benefits) arnalǵan 45 paıyzdyq maqsatty, sondaı-aq Klımattyń ózgerýi jónindegi is-qımyl josparynda kózdelgen 35 paıyzdyq mejeni alyp tastaımyz. Biz osy ýaqytqa deıin seriktes elderdiń suranysy men qajettilikterin qanaǵattandyrý baǵytynda aýqymdy jumys atqardyq. Aldaǵy nátıjeler ár memlekettiń óz maqsat-mindetine baılanysty bolady jáne halyqaralyq mindettemelerge sáıkes Banktiń saraptamalyq qoldaýymen júzege asyrylady», – delingen habarlamada.
Uıym klımat salasyndaǵy eki negizgi kórsetkish boıynsha monıtorıng júrgizýdi jáne málimetterdi jarııalaýdy jalǵastyratynyn málimdedi. Olar – parnıktik gazdardyń taza shyǵaryndylarynyń kólemi jáne klımattyq táýekelderge tótep berý múmkindigi artqan adamdar sany.
Osyǵan deıin teńizdiń jylynýy jańa klımattyq qaýipterdi kúsheıtip otyrǵany týraly jazdyq.
