Dúnıejúzilik bank Qyrǵyzstanǵa aýyz sýǵa qol jetkizý úshin 121 mln dollar bóldi

ASTANA. KAZINFORM — Dúnıejúzilik banktiń atqarýshy dırektorlar keńesi Qyrǵyz Respýblıkasyndaǵy «Sýmen jabdyqtaýǵa jáne sanıtarııaǵa jalpyǵa ortaq qoljetimdilik» baǵdarlamasynyń birinshi kezeńine 121 mln dollar bólýdi maquldady, dep habarlaıdy Kazinform tilshisi. 

Dúnıejúzilik banktiń málimetinshe, joba Azııa ınfraqurylymdyq ınvestıtsııalar bankiniń (AIIB) 50 mln dollar nesıesi, Munaı eksporttaýshy elder uıymy qorynyń 20 mln dollar nesıesi, Shveıtsarııanyń damý jáne yntymaqtastyq agenttiginiń 9 mln dollar granty jáne AIIB 3,75 mln dollar granty esebinen birlesip qarjylandyrylady.

— Aldaǵy onjyldyqta baǵdarlama Qyrǵyzstannyń mıllıon azamaty úshin taza sý men sanıtarııaǵa qoljetimdilikti qamtamasyz etedi, bul ómir sapasyn tikeleı jaqsartady, adamı kapıtaldy nyǵaıtady jáne bolashaq urpaqtyń ál-aýqatyn arttyrady, — dep atap ótti Dúnıejúzilik banktiń Qyrǵyz Respýblıkasyndaǵy ókildiginiń basshysy Hıý Rıddell.

Qyrǵyzstandaǵy «Sýmen jabdyqtaýǵa jáne sanıtarııaǵa jalpyǵa ortaq qoljetimdilik» baǵdarlamasynyń birinshi kezeńin qarjylandyrý Halyqaralyq damý qaýymdastyǵy arqyly jeńildetilgen sharttarmen júzege asyrylady. Joba 2029 jylǵa qaraı satyp alý, qarjylyq basqarý jáne sybaılas jemqorlyqqa qarsy saıasatty qosa alǵanda, joǵary halyqaralyq standarttarǵa sáıkes júzege asyrylatyny atap ótildi.

Buǵan deıin Qyrǵyzstan saýdagerler úshin patent júıesin qaıta engizgenin jazǵan bolatynbyz.