Dúnıejúzilik bank Qazaqstandaǵy memlekettik kásiporyndardy basqarý júıesin reformalaýǵa kiristi
ASTANA. KAZINFORM — Qazaqstanda memlekettik kásiporyndardy basqarý júıesin reformalaý bastaldy. Básekelestikti qorǵaý jáne damytý agenttigi men Dúnıejúzilik bank reformanyń negizgi baǵyttaryn aıqyndady. Bul týraly agenttiktiń baspasóz qyzmeti málim etti.
Qazaqstan Respýblıkasy Básekelestikti qorǵaý jáne damytý agenttiginiń tóraǵasy Marat Omarov Eýropa jáne Ortalyq Azııa boıynsha praktıka baǵytynyń óńirlik jetekshisi Sesıl Tıoro Nıang bastaǵan Dúnıejúzilik bank delegatsııasymen kezdesti.
Taraptar memleket qatysatyn kásiporyndardy basqarý jáne ıelený salasyndaǵy reformalar boıynsha tehnıkalyq kómek kórsetý jobasyn praktıkalyq iske asyrý máselelerin talqylady.
Agenttiktiń málimetinshe, baǵdarlama úsh negizgi baǵytty qamtıdy.
Birinshi baǵyt — memlekettik kásiporyndar portfelin ońtaılandyrý. Ol memlekettik qatysýdyń ekonomıkalyq oryndylyǵyna qaraı kásiporyndardy jikteýdi, memlekettik kompanııalardyń biryńǵaı resmı tizilimin qalyptastyrýdy, sondaı-aq qoǵam úshin mańyzdy qyzmetterdi esepke alý jáne olardyń shyǵyndaryn óteý qaǵıdattaryn engizýdi kózdeıdi.
Ekinshi baǵyt — ıelený fýnktsııasyn kúsheıtý. Ol memlekettik monıtorıng júıesiniń tıimdiligin jetildirýge, shoǵyrlandyrylǵan eseptilikti engizýge jáne dırektorlar keńesiniń múshelerin merıtokratııa qaǵıdattary negizinde irikteýge baǵyttalǵan.
Úshinshi baǵyt Ulybrıtanııanyń beıindi uıymdarynyń qoldaýymen tájirıbe almasýdy, saraptamalyq áleýetti damytýdy jáne quzyretterdi berýdi kózdeıdi.
Agenttik basshysy jobany qoldap, onyń korporatıvtik basqarýdy nyǵaıtýdaǵy, básekelestik ortany damytýdaǵy jáne Qazaqstan ekonomıkasyna jeke ınvestıtsııalardy tartý úshin jaǵdaı jasaýdaǵy mańyzdy rólin atap ótti.
Aıta keteıik, buǵan deıin Qazaqstanda bızneske qatysty monopolııaǵa qarsy talaptar kúsheıtiletinin jazdyq.
