Dúnıejúzilik bank Bishkekti kógaldandyrýǵa 50 mln dollar bóldi
ASTANA. KAZINFORM — Qyrǵyzstan Bishkekti kógaldandyrý úshin bankten 50 mln dollar aldy, dep jazady Kabar.
Dúnıejúzilik bank Bishkek qalasyn kógaldandyrýǵa, sýarý júıesin jańǵyrtýǵa jáne shań-tozańmen kúreske baǵyttalǵan 50 mıllıon AQSh dollaryn quraıtyn jobany iske qosty. Bul týraly Qyrǵyzstannyń Tabıǵı resýrstar, ekologııa jáne tehnıkalyq qadaǵalaý mınıstri Meder Mashıev málimdedi.
— Ótken aptada men Bishkektegi jasyl jelekterge ınspektsııa júrgizdim. Vıtse-mer Ramız Alıevpen birge «Jasyl sharýashylyq» mekemesiniń nysandaryn araladyq. Biz olarǵa sýarý júıesin jańǵyrtýǵa arnalǵan jabdyqtar satyp alyp jatyrmyz. Ózińiz bilesiz, sýarý júıesiniń jaǵdaıy óte nashar. Sonymen qatar 18 sý uńǵymasyn burǵylaý josparlanǵan, — dedi mınıstr.
Mınıstrdiń aıtýynsha, Bishkek pen Shý oblysyndaǵy atmosferalyq aýanyń sapasyn jaqsartý maqsatynda 2025–2026 jyldarǵa arnalǵan is-qımyl jospary ázirlengen.
Sondaı-aq Mashıev el astanasyndaǵy smogpen kúrestiń negizgi sharalarynyń biri — «B3Sh» markaly (qońyr kómir, shlak) kómirdi satýǵa tyıym salý ekenin atap ótti. Óıtkeni ol aýaǵa eń kóp zııan tıgizetin negizgi lastaýshy kózderdiń biri sanalady.
Buǵan deıin Qyrǵyzstannyń memlekettik qaryzy JІÓ-ge shaqqanda 36,9%-ǵa deıin tómendegenin jazǵanbyz.