Dúnıejúzilik bank: Bıyl Ózbekstan ekonomıkasy 6 paıyzǵa ósedi
TAShKENT. KAZINFORM — Dúnıejúzilik banktiń boljamyna sáıkes, 2026 jyly Ózbekstannyń ishki jalpy ónim kólemi 6 paıyzǵa ósedi, dep habarlaıdy Kazinform agenttiginiń menshikti tilshisi.
Dúnıejúzilik banktiń baıandamasynda jazylǵandaı, 2027 jyly kórshiles el ekonomıkasynyń ósimi sál baıaýlap, jyldyq kórsetkish 5,9% shamasynda bolady.
Buǵan qaramastan, Ózbekstan, Qyrǵyzstan (6,5%) jáne Tájikstan (6,2%) Ortalyq Azııa aımaǵyndaǵy ekonomıkasy qarqyndy damyp kele jatqan elderdiń qatarynda qalady.
Bul rette, boljamǵa saı, bıyl qazaqstandyq ishki jalpy óniminiń ósimi 4,5% shamasynda saqtalady.
Eske salaıyq, byltyr 9 aıdyń qorytyndysyna sáıkes, Ózbekstannyń jalpy memlekettik qaryzy 75 mlrd dollardan asty.
Sondaı-aq, 2025 jyly Ózbekstannyń ishki jalpy ónim kólemi tuńǵysh ret 145 mlrd dollardan asty.
Buǵan deıin habarlaǵanymyzdaı, 2026 jyly Ózbekstan úkimeti memlekettik bıýdjettiń 55% áleýmettik salaǵa baǵyttamaq.
Munymen birge, Ózbekstan kóleńkeli ekonomıkanyń ishki jalpy ónimdegi úlesin 29%-ǵa deıin tómendetýge nıetti.
Taıaýda Ózbekstan ekonomıkasynyń 8,3 mlrd dollardan asa qarajaty kóleńkede qalyp otyrǵanyn jazyp edik. Osylaısha, ol ishki jalpy óniminiń 33,3 paıyzyna teńelip otyr.
