Dúnıejúzilik bank bes jyl burynǵy derekti paıdalanǵan - depýtat PISA zertteýine pikir bildirdi
Májilis depýtaty Ashat Aımaǵambetov erteń PISA zertteýiniń nátıjesi shyǵatynyn eske salǵan, dep habarlaıdy Kazinform.
"Dúnıejúzilik bank «qazaqstandyq oqýshylar saýatsyz» dep aqparat jarııalanǵannan keıin jekemege kóptegen adam jazdy. Bul klıkbeıt tezıs kópshilikti shatastyryp jiberdi.
Olar bes jyl burynǵy, ıaǵnı 2018 jylǵy PISA-nyń nátıjesin paıdalanǵanyn jáne onyń dástúrli túsiniktegi akademııalyq bilimdi emes, oqýshynyń bilimdi kúndelikti ómirde qoldana bilý qabiletin baǵalaıtynyn bári túsine bermeıdi.
Buǵan qosa, 2018 jyldan keıin birneshe zertteý júrgizilgendigin atap ótken jón. Máselen, 200 mektepti, keıin 1000 mektepti qamtyǵan «Mektepterge arnalǵan PISA» jáne resmı “PISA-2022” zertteýi júrgizildi.
Árıne, oqýshylardyń alǵan bilimin kúndelikti ómirde qoldana bilý daǵdysyn – fýnktsıonaldyq saýattylyqty damytý baǵytynda jumys jasaý kerek degenge kelisemin", - dep atap ótken májilismen.
Ol salada problemalar áli de jetkilikti ekenin joqqa shyǵarmaıdy. Alaıda, eks-mınıstrdiń paıymynsha, bul olqylyqtyń basty sebebi – mektep baǵdarlamasy uzaq jyldar boıy akademııalyq bilimdi ǵana jınaqtaýǵa baǵyttalǵandyǵynda.
"Sondyqtan memleket tarapynan túrli sharalar qabyldandy, 2016 jyldan bastap fýnktsıonaldyq saýattylyqty damytý úshin jańartylǵan oqý baǵdarlamasy da engizildi.
Al endi bizdiń oqýshylarymyzdyń nátıjesine kelsek, PISA-2022 zertteýiniń qorytyndysy erteń jarııalanady. Mine, sodan keıin keńirek analız jasap, naqty saýattylyq deńgeıi týraly aıtýǵa bolady", - deıdi Ashat Qanatuly.
Aıta ketetin taǵy bir másele, Dúnıejúzilik bank sarapshylary (basqa sarapshylar da) pandemııa kezindegi karantınge baılanysty oqýshylarymyzdyń kórsetkishi 1,5-2 jylǵa (40-tan 60 ballǵa deıin) tómendeıdi dep boljaǵan edi. "Osy boljam oryndaldy ma?" degen suraqtyń jaýaby da erteń shyǵady.
"Osy PISA-2022 nátıjesi negizinde qashyqtyqtan oqytý kezinde júrgizilgen jumystyń tıimdiligin de baǵalaýǵa bolady dep sanaımyn.
Qalaı bolsa da 80-ge jýyq memleket qatysatyn zertteýdiń nátıjesi birqatar paıdaly aqparat beretini sózsiz. Nátıjeni asyǵa kútemiz", - degen depýtat.
