«Dúnıejúzilik úılesimdilik júgirisi» halyqaralyq estafetasynyń alaý alyp júrýshileri búgin Astanaǵa jetti
ASTANA. Maýsymnyń 24-i. QazAqparat /Marlan Jıembaı/ - Búgin elordadaǵy Otan ana monýmentiniń aldynda elordalyq turǵyndar «Dúnıejúzilik úılesimdilik júgirisi» halyqaralyq estafetasy aıasyndaǵy alaý alyp júrýshiler tobyn qarsy aldy.
Internatsıonaldy komanda 2010 jylǵy sáýirdiń 24-i kúni Japonııanyń Hırosıma qalasynda bastaý aldy. Estafeta baǵdarlamasy boıynsha azııalyq tarmaq Ońtústik Koreıa, Qytaı, Mońǵolııa, Qazaqstan, Ortalyq Azııa jáne Reseı arqyly júrip ótip, aldaǵy qyrkúıektiń 27-si kúni Máskeýde, 2010 jylǵy aqpannyń 26-sy kúni Dýblınnen shyǵyp, Eýropanyń 49 elin aralap kelgen estafetanyń eýropalyq tarmaǵymen kezdesetin bolady. Sóıtip, 47 myń shaqyrym qashyqtyqta jatqan Batys pen Shyǵystyń arasynda biregeı baılanys ornatpaq.
Qazaqstanda Dúnıejúzilik úılesim júgirisi Semeı - Pavlodar - Astana - Qaraǵandy - Balqash - Almaty - Taraz - Shymkent qalalaryn basyp ótetin bolady. Oǵan bizdiń elden Baltabek Nurahmetov qatysýda.
«Búgin alǵash ret qymyzdyń dámin tattym, keremet, maǵan qatty unady. Sodan keıin 20-25 jaqyrym jol júgirip ótip edim, tipti shóldemedim de. Sý ishkim kelmeıdi, al qymyz bolsa bas tartpas edim», deıdi estafetaǵa qatysýshylardyń biri Andreı.
Azııalyq tarmaq boıynsha mejeli qashyqtyqtaryn eńserip kele jatqan komanda búgingi kúnge deıin 8 myń shaqyrymdy artta qaldyrdy, máre syzyǵyna deıin áli 12 shaqyrym bar.
Eriktilerdi elordalyqtar atynan ıÝNISEF-tiń Qazaqstandaǵy ókili Haana Sınger men Ulttyq sport oıyndary klýbynyń dırektory Samat Jylqybaev saltanatty jaǵdaıda qarsy alyp, olarǵa estelik medaldary men baǵaly syılyqtar tabys etti.
