Dúnıejúzilik teatr festıvali: Elordaǵa «Oskar» syılyǵynyń ıegeri keldi

«Astana» ІІ Dúnıejúzilik teatr festıvaliniń qorytyndysyna oraı búgin Ortalyq kommýnıkatsııalar ortalyǵynda baspasóz máslıhaty ótti. Jıynda sóz bastaǵan QR Eńbek eri, Qazaqstan teatrlary qaýymdastyǵynyń prezıdenti, KSRO jáne Qazaqstannyń halyq ártisi Asanáli Áshimov sheteldik teatr óneriniń maıtalmandary elordanyń kórkine tamsanyp jatqanyn jetkizdi.

«Bul kúnderi eńseli elordamyzda «Astana» ІІ Dúnıejúzilik teatr festıvali ótip jatyr. Byltyr bastalǵan aýqymdy shara bıyl ekinshi ret ótkizildi. Qytaı, Japonııa, Ulybrıtanııa, Polsha, Germanııa, Italııa sekildi elderden ónerpazdar kelip, halyqqa spektaklderin kórsetip, qalamyzdy aralady. Shahar jaıly kóńil-kúıleri joǵary. Biz soǵan rıza bolyp otyrmyz. Ár ýaqytta qonaqtardy durystap qabyldaý - bizdiń mindetimiz. Jýyq arada Eýrazııa kınofestıvali bastalady. Onda da búkil álem elderiniń kınomatografısteri keledi. Bunyń bári bizdiń elge degen shet memleketterdiń kóńilderiniń joǵary ekenin kórsetedi. Osynyń bárin abyroı. Halyqtyń abyroıy, eldiń mádenıetiniń óskeni», - deıdi ol.

Asanáli Áshimov eki aptanyń ishinde Frantsııadan, Anglııadan kelgen teatr salasyndaǵy ádil qazylarmen teatr ónerin taldaǵanyn atap ótti.

«Mine, sonyń bári ár ýaqytta eldiń úlken dárejesi. Astananyń 20 jyldyq toıy kele jatyr. Astananyń ósip-órkendeýine atsalysyp jatqan azamattarǵa, Elbasyǵa zor alǵysymdy aıtamyn. Qysqa merzimniń ishinde alyp shahar turǵyzyldy. Qalanyń kórki kelgen meımandardyń joǵary baǵasyna ıe bolyp jatyr. Ortamyzda, mine, Jıýlet Bınosh atty teatr jáne kıno aktrısasy otyr. «Oskar» syılyǵynyń ıegeri. Bul kisiniń eki kezdesýi bolady. Sheberlik sabaǵyn ótkizedi. Halyqpen kezdesedi. Sondyqtan, bul kisini quttyqtap qoıalyq», - dedi ol

Óz kezeginde «Qazaqkontsert» memlekettik kontserttik uıymynyń dırektory Jeńis Seıdollauly atalmysh festıval - Shyǵys pen Batystyń órkenıetin toǵystyrǵan aýqymdy shara ekenin atap ótti.

«Astana shaharynda bizdiń otandyq teatrlarmen birge álemdik teatrlardyń óneri toǵysty. Álemdik úzdik qoıylymdardyń bizdiń myqty teatr ónerpazdarynyń ónerimen birge bir sahnada qoıylýy - jetistigimiz dep oılaımyn. Rasynda da, álemdik deńgeıdegi aktrısa Jıýlet Bınoshtyń bizdiń ortamyzǵa kelip, bizdiń elge, teatr men kınoǵa degen mahabbatyn tanytyp jatqanyna rızamyz», - dedi Jeńis Seıdollauly.

Budan keıin sóz alǵan 1997 jylǵy «Oskar» syılyǵynyń ıegeri Jıýlet Bınosh Astanaǵa búgin tańerteń ǵana kelgenin atap ótti.

«Qazaqstan elimen, jurtshylyǵymen endi ǵana tanysyp jatyrmyn. Alǵashqy áserim - keremet. Alyp dala, júzi jarqyn jandar, qonaqjaılyq - meni bári-bári qýantady. Kelesi joly kelgenimde Qazaqstan halqymen tereńirek tanysýǵa ýaqytym bolar degen úmittemin. Astana shaharynyń óte aýqymdy da kórikti sáýleti baryn kórip otyrmyn. Tipti qyzǵana qaraǵanymdy jasyrmaımyn. Sizdiń memleketterińiz bizdikinen bes ese úlken. Men sondaı-aq sizderdiń otandastaryńyz Samal Eslámovanyń jetistigine qýanyshtymyn», - dedi mártebeli meıman.

Aıta ketsek, «Astana» ІІ Dúnıejúzilik teatr festıvali «Rýhanı jańǵyrý» baǵdarlamasy men elordamyzdyń 20 jyldyǵyn merekeleý aıasynda ótkizilip jatyr. «Astana» teatr festıvali álemdik teatr ujymdary óner kórsetetin mádenı aýqymdy sharaǵa aınaldy. Festıvaldi QR Mádenıet jáne sport mınıstrliginiń uıymdastyrýymen «Qazaqkontsert» memlekettik kontserttik uıymy men Qazaqstan teatrlar qaýymdastyǵy ótkizdi. Festıvalǵa 13 elden kelgen 17 teatr 18 spektakl qoıdy.

Erteń elordadaǵy Beıbitshilik jáne kelisim saraıynda saǵat 19:00-de «Astana» ІІ Dúnıejúzilik teatr festıvaliniń jabylý saltanaty ótedi. Keshte álemdik kınomatografııanyń jaryq juldyzy Jıýlet Bınosh (Frantsııa) qala turǵyndary men meımandaryn monospektaklmen qýantady. «Oskar» syılyǵynyń ıegeri Jıýlet Bınosh «Júrekten shyqqan syrly sóz» shyǵarmashylyq keshin usynady.