Dúnıejúzilik shahmat olımpıadasynyń ashylýynda nege Qazaqstan týy bolmady
NUR-SULTAN. QazAqparat – Úndistanda 44-shi dúnıejúzilik shahmat olımpıadasy bastaldy. Aıtýly dodanyń ashylý saltanatynda elimizdiń týy bolmady. Osyǵan baılanysty QR shahmat federatsııasynyń baspasóz qyzmeti túsinik berdi, dep habarlaıdy QazAqparat tilshisi.
«Buǵan deıingi olımpıadalarda sportshylardyń sherýi bolǵan joq. Ádette, memlekettik tý olımpıadanyń jabylý saltanatynda jeńimpazdardy marapattaý sátinde qajet. Bıyl uıymdastyrýshylar tý alyp shyǵýdy uıǵarǵan, biraq delegatsııany tıisti deńgeıde habardar etpedi», - degen jaýap berildi federatsııadan.
Sondaı-aq, shahmat olımpıadasynyń ashylý saltanatynda Qazaqstannan basqa da elderdiń týsyz shyqqany aıtylǵan.
«Olımpıadaǵa qatysýshy elderdiń jartysynan kóbine memlekettik tý týraly eskertilmegen. Al, keıbir memleket ókilderi sherýge múldem qatyspady», - deıdi vedomstvodan.
Aıta ketsek, 44-shi dúnıejúzilik shahmat olımpıadasynyń ashylý saltanatynda Qazaqstan Respýblıkasyn halyqaralyq grossmeıster Jansaıa Ábdimálik jáne halyqaralyq sheber Arystanbek Orazaev tanystyrdy.
Al, atalǵan dodada elimizdiń namysyn erler men áıelder qurama komandasy qorǵaıdy.
Erler qurama komandasy:
Rınat Jumabaev
Murtas Qajyǵalıev
Arystanbek Orazaev
Qazybek Nógerbek
Álisher Súleımanov
Áıelder qurama komandasy:
Jansaıa Ábdimálik
Bıbisara Asaýbaeva
Gúlishan Nahbaeva
Ksenııa Balabaeva
Nazerke Nurǵalı
