Dúnıejúzilik saýda uıymyn reformalaý protsesin bastaý kelisildi

JENEVA. QazAqparat – Jenevada 5 kún boıy ótken Dúnıejúzilik saýda uıymynyń (DSU) 12-shi mınıstrlik konferentsııasynda álemdik saýda úshin mańyzdy máselelerdiń keń aýqymy boıynsha konsensýsqa qol jetkizildi, dep habarlaıdy QazAqparat.

QR Saýda jáne ıntegratsııa mınıstrliginen málim etkendeı, DSU-nyń 12-shi mınıstrlik konferentsııasynyń tóraǵasy jáne teń uıymdastyrýshysy – Qazaqstan Respýblıkasy.

Konferentsııanyń tóraǵasy qyzmetin Qazaqstan Respýblıkasy Prezıdenti Ákimshiligi basshysynyń birinshi orynbasary Tımýr Súleımenov atqardy.

Bes kúnge jalǵasqan uıymǵa múshe 164 eldiń qarqyndy kelissózderi óz jemisin berdi. Nátıjesinde álemdik saýda úshin mańyzdy máselelerdiń buryn-sońdy bolmaǵan sany boıynsha konsensýsqa qol jetkizdi.

Atap aıtqanda,

- DSU-ny reformalaý protsesin bastaý;

- DSU-nyń COVID-19 pandemııasyna den qoıý sharalary jáne bolashaq pandemııaǵa daıyndyǵy týraly mınıstrlik deklaratsııasyn qabyldaý;

- DSU-nyń zııatkerlik menshik quqyqtarynyń saýda aspektileri jónindegi kelisimi boıynsha mınıstrlik sheshimin (TRIPS) qabyldaý;

- Azyq-túlik qaýipsizdigine jedel den qoıý sharalary týraly mınıstrlik deklaratsııasyn qabyldaý;

- Azyq-túlik satyp alýdy Dúnıejúzilik azyq-túlik baǵdarlamasymen eksporttyq tyıymdar men shekteýlerden bosatý týraly mınıstrlik sheshimin qabyldaý;

- elektrondyq saýda jónindegi jumys baǵdarlamasyn qabyldaý;

- DSU-nyń balyq aýlaýǵa arnalǵan sýbsıdııalar týraly jańa kelisimin qabyldaý.

Sońǵy másele boıynsha kelissózder 20 jyldan astam ýaqytqa sozylǵanyn atap ótken jón.

Mınıstrlik konferentsııasy 15 maýsymda aıaqtalýy kerek edi, biraq mınıstrler konferentsııany bir kúnge uzartýǵa kelisken.

Aıta keteıik, DSU-ǵa múshe elder 2018 jyldyń kúzinde DSU-nyń 12-shi mınıstrlik konferentsııasyna tóraǵalyq etýshi jáne qabyldaýshy tarap retinde Qazaqstandy biraýyzdan saılady.

Konferentsııa Nur-Sultan qalasynda 2020 jyldyń maýsym aıynda ótkizilýi tıis edi. Koronavırýs pandemııasyna baılanysty ol keıinge shegerildi.