Dúnıejúzilik oıynda altyn medal alǵan mańǵystaýlyq polıtseı-sportshylar marapattaldy

AQTAÝ. QazAqparat - Mańǵystaýlyq sportshy-polıtseılerge Іshki ister mınıstri Marat Ahmetjanov marapat tabystady. Bul týraly Mańǵystaý oblystyq Polıtsııa departamenti málim etti, dep habarlaıdy QazAqparat tilshisi.

22-31 shilde aralyǵynda Gollandııa memleketi Rotterdam qalasynda polıtseıler men órt sóndirýshiler arasynda sporttan dúnıejúzilik oıyn ótkizildi. Búkilálemdik bul dodaǵa álemniń 97 elinen barlyǵy 13500 sportshy jınalǵan. Olardyń qatarynda qazaq eliniń, Mańǵystaý ólkesiniń namysyn qorǵaǵan ishki ister organdary qyzmetkerleri bar.

«Búkil álemniń kúsh qurylymdary arasyndaǵy bul dodada bokstan 75 kg salmaq dárejesinde polıtsııa kapıtany Jandos Sultanov, karate sportynan 70 kg salmaq dárejesinde polıtsııa leıtenanty Musa Beksultan men 75 kg salmaq dárejesinde polıtsııa kapıtany Mergen Kalımjanov birinshi oryndy ıelenip, altyn medal júldegerleri atandy. Sondaı-aq bokstan eki qyzmetker kúmis medal ıelendi. Olar polıtsııa kapıtany Berik Abdrahmanov jáne polıtsııa leıtenanty Dıdar Alǵalıev» delingen málimette.

ІІM-de ótken marapattaý saltanatty sharasynda júldeger atanǵan barlyq polıtseıge mınıstr Marat Ahmetjanov marapat tabystady.