Dúnıejúzilik kóshpendiler oıyny: Qazaqstan 3 «altyn» jeńip aldy

ANKARA. QazAqparat – IV Dúnıejúzilik kóshpendiler oıyndarynda qazaq sportshylary 9 medal jeńip aldy, onyń ishinde 3 altyn, 4 kúmis jáne 2 qola. Bul týraly QR Mádenıet jáne sport mınıstrliginen málim etti, dep habarlaıdy QazAqparat.

Jarys alǵash ret Túrkııada ótti, oǵan álemniń 102 memleketinen 3 myńnan astam sportshy 13 sport túrinen qatysty. Qazaq sportshylary sporttyń 5 túrinen (qazaq kúresi, kókpar, kókbóri, jamby atý, sadaq atý) óner kórsetti.

Sonymen, qazaq kúresinen QR quramasy qorjynynda 6 medal bar: Marat Nyǵmatýllaev 60 kelige deıingi salmaqta jeńimpaz atandy. Sondaı-aq 65 kelige deıingi sanattaǵy «altyndy» Zarına Sarıpova jeńip aldy. Elaman Qoıshybaev (80kg) pen Raýza Nurmuhammetova (55 kg) – kúmis, al «Qazaqstan barysy» Maqsat Isaǵabylov (+80 kg) pen Móldir Azamat (+65 kg) qola júldeger atandy.

Qasymhan Qanat dástúrli sadaq atýdan fınalda óner kórsetti, onda 32 elden 95 sportshy baq synady. Ol óziniń qarsylasy Oǵyz Okshadan 2 upaı aıyrmashylyǵymen jeńilip, kúmis júldege ıe boldy.

Kókbórige Qazaqstan, Qyrǵyzstan, Túrkııa komandalary qatysty. Túrkııa komandasy óz qalaýy boıynsha úshinshi orynǵa kelisim berip, aqtyq synǵa qazaq-qyrǵyz quramalary ótti. Aqtyq synda Qazaqstan – Qyrǵyzstan komandalarynyń oıyny 0-5 esebimen aıaqtalyp, sportshylarymyz kúmis júldege qol jetkizdi.

Qazaqstan quramasy kókpardan chempıon atanyp, Qyrǵyzstan komandasyn 4:3 esebimen jeńdi. Fınalǵa jetý jolynda qazaqstandyqtar Ózbekstan men Mońǵolııa sportshylaryn 8:1 jáne 12:2 esebimen oısyrata jeńgen bolatyn. Mınıstr Dáýren Abaev Facebook-tegi paraqshasynda kókpar tuńǵysh ret kóshpendiler oıyndarynyń baǵdarlamasyna engenin jáne bul jeńis biregeı tarıhı oqıǵa ekenin atap ótti.