Dúnıejúzilik kóshpendiler oıyndaryna qatysýshylardyń daıyndyǵy úshin barlyq jaǵdaı jasaldy

ASTANA. QazAqparat – IV Dúnıejúzilik kóshpendiler oıyndaryna qatysatyn el sportshylarynyń daıyndyǵy úshin barlyq jaǵdaı jasaldy. Ortalyq kommýnıkatsııalar qyzmetindegi brıfıng barysynda Sport jáne dene shynyqtyrý komıtetiniń tóraǵasy Samat Erǵalıev osylaı málimdedi, dep habarlaıdy QazAqparat tilshisi.

«Dúnıejúzilik kóshpendiler oıyndary úsh ret qatarynan Qyrǵyz jerinde ótken bolatyn. Bıylǵy oıyndardyń estafetasyn Túrkııa Respýblıkasy qabyldap otyr. Tórtinshi márte uıymdastyrylyp otyrǵan Dúnıejúzilik kóshpendiler oıyndaryna Qazaqstannyń sporttyq delegatsııasy qatysady. Sporttyq shara baǵdarlamasyna 13 oıyn túri engen. Qazaqstan quramasy 5 sport túrinen jarysqa qatysady. Atap aıtqanda, kókpar, jamby atý, qazaq kúresi, kókbóri, dástúrli sadaq atýdan cportshylarymyz baq synaıdy. Teńge ilý men aýdaryspaqtan sportshylar kórsetilim jasaıdy.

Memleket tarapynan sportshylardyń oıyndarǵa daıyndyǵy men qatysýyn qatamasyz etý úshin barlyq jaǵdaı jasaldy. Atap aıtqanda, bıyldyń ózinde kókpar sportynan qurama komanda 4 oqý-jattyǵý jıynyn ótkizdi. Qazaq kúresinen 3 oqý-jatyǵý jıyny shet elde, ıaǵnı Grýzııanyń Gorı qalasynda ótti. Sportshylar qajetti sporttyq kıim-keshekpen qamtamasyz etildi», - dedi Samat Erǵalıev.

Onyń sózinshe, Qazaqstan qurama komandasy buǵan deıingi oıyndarǵa da belsene qatysyp, júldeli oryndardan kóringen. Máselen, jalpy komandalyq esepte 2014 jyly - 2 oryn, 2016 jyly - 3 oryn, 2018 jyly 2 orynǵa ıe bolǵan.

Aıta ketsek, 29 qyrkúıek pen 4 qazan aralyǵynda Túrkııanyń Iznık qalasynda IV Dúnıejúzilik kóshpendiler oıyndary ótedi. Onda qazaq kúresinen tuńǵysh ret Qazaqstan áıelder quramasy saıysqa túsedi .

Brıfıng barysynda Ulttyq jáne at sporty túrleri ortalyǵynyń dırektory Baqdáýlet Sábıtov Dúnıejúzilik kóshpendiler oıyndarynda qazaqstandyq top qaı saıystan júlde alýy múmkin ekenine boljam jasaǵan bolatyn.