Dúnıejúzilik Islam lıgasynyń Bas hatshysy TMD elderi mýftıleriniń jáne dinı qaıratkerleriniń qatysýymen Astanada halyqaralyq konferentsııa ótkizýdi usyndy
ASTANA. Qarashanyń 2-si. QazAqparat - TMD elderi mýftıleriniń jáne dinı qaıratkerleriniń qatysýymen Astanada halyqaralyq konferentsııa ótkizýdi Dúnıejúzilik Islam lıgasynyń Bas hatshysy Abdalla at-Týrkı dúısendi kúni Mekkede QR Parlamenti Senatynyń vıtse-spıkeri Muhambet Kópeevpen kezdesýi barysynda usyndy.
Abdalla ben Abdel Mohsen at-Týrkı bul forýmnyń 2010 jyldy Mádenıetter men dinderdiń jaqyndasý jyly dep jarııalaý týraly qazaqstandyq bastamany iske asyrý aıasynda ótýi múmkin degen pikir bildirdi, dep habarlaıdy Senattyń baspasóz qyzmeti.
Buǵan deıin qazannyń 31-i men qarashanyń 4-i aralyǵynda Saýd Arabııasy Koroldiginde saparmen júrgen qazaqstandyq delegatsııany QR Parlamenti Senatynyń vıtse-spıkeri M.Kópeevtiń basqaryp barǵany habarlanǵan bolatyn.
M.Kópeev Qazaqstan basshylarynyń atynan Dúnıejúzilik Islam lıgasynyń Bas hatshysyna aǵymdaǵy jylǵy shildede Astanada ótken Álemdik jáne dástúrli dinder lıderleriniń ІІІ sezine jeke óziniń qatysqany úshin alǵysyn bildirdi.
QR Prezıdenti N.Nazarbaevtyń bastamasymen konfessııaaralyq, órkenıetaralyq jáne mádenıetaralyq kelisimderdi nyǵaıtýǵa baǵyttalǵan musylman álemindegi halyqaralyq uıymǵa osy bedeldi uıym tarapynan kórsetilgen qoldaýdyń mańyzdylyǵyn ataı otyryp, vıtse-spıker qazirgi álemdegi problemalardy sheshýdegi dıalogtardyń tetikterin odan ári damytý qajettigin aıtty.
Kezdesýge sonymen qatar, Qazaqstan Respýblıkasynyń Saýd Arabııasyndaǵy Elshisi Q.Lama Sharıf qatysty.
