Dúnıejúzilik etnosport konfederatsııasy Túrkııada 2 myń kıiz úı tigedi
«Anadolymen» áńgime barysynda Bılal Erdogan málim etkendeı, Dúnıejúzilik etnosport konfederatsııasy zardap shekkenderge alǵashqylardyń biri bolyp kómekke umtylyp, túrli is-sharalarda qoldaný úshin qoımalarda turǵan 70 kıiz úıdi zilzaladan keıingi alǵashqy aptada-aq jóneltken.
Onyń aıtýynsha, dál sol ýaqytta Qazaqstan men Qyrǵyzstanda kıiz úılerdi jiberý qolǵa alynyp jatty.
«Biz Tabıǵı apattar men tótenshe jaǵdaılarmen kúres jónindegi basqarmanyń (AFAD) jetekshiligimen 250-ge jýyq kıiz úı qurdyq. Munda qazaq jáne qyrǵyz baýyrlarymyzben birge bizdiń komandalar da keldi, olar kıiz úı quraýmen aınalysty. Mine, sondyqtan da Qazaqstan men Qyrǵyzstannyń týlaryn kezdestirýge bolady.
Keıin shatyrlar sanyn ulǵaıtýdy oıladyq. Mońǵolııa, Qazaqstan, Qyrǵyzstan, Ózbekstan jáne Ázerbaıjanmen yqpaldastyq sheńberinde túrli aımaqtarda 2 myńnan astam kıiz úı ornata alamyz. Olardyń árqaısysy nıettestik lagerine aınalatyn bolady», - dedi Bılal Erdogan.
Dúnıejúzilik etnosport konfederatsııasynan atap ótkendeı, Gıýngoren mýnıtsıpalıtetiniń qoldaýymen Geksýn aýdanynda 100 kıiz úı boı kóterdi.Taǵy 200-i Ýskıýdar mýnıtsıpalıtetiniń qoldaýymen oqýǵa túsýge daıyndalyp jatqan stýdentter úshin tigildi.
Aıta keteıik, Túrkııada álsin-álsin jer silkinisi búgingi kúnge deıin tirkelip otyr.
Joıqyn eki zilzala 6 aqpanda Túrkııanyń Kahramanmarash provıntsııasynda boldy. Magnıtýdasy 7 baldan asty. Terbelis eldiń 10 provıntsııasynda, sondaı-aq kórshiles memleketterde, sonyń ishinde Sırııada sezildi. Osy tabıǵı apattan Túrkııaǵa kelgen shyǵyn 105 mlrd dollardan asty.
Túrkııada 6 aqpan – 31 naýryz aralyǵynda 22,5 myń jerasty dúmpýi tirkeldi.
Sońǵy resmı derekterge sáıkes, zilzala 50 096 adamnyń ómirin qıdy. 107 204 adam zardap shekti.
Seısmıkalyq belsendilik Orta Azııada baıqalyp jatyr.
