Dúnıejúzilik densaýlyq uıymy koronavırýstyń jyldam tarap jatqanyn eskertti
RIM. QazAqparat – Búkil álem pandemııanyń jańa qaýipti kezeńine ótti, vırýs áli de tez taralyp, adam ómirine qaýip tóndirtip tur. Bul týraly juma kúni Dúnıejúzilik densaýlyq saqtaý uıymynyń basshysy Tedros Gebreıesýs málim etti, dep habarlaıdy QazAqparat BBC-ke silteme jasap.
Djons Hopkıns ýnıversıtetiniń málimetinshe, álemde koronavırýsqa shaldyqqan 8,5 mln astam adam bar, indetten 454,5 myń adam qaıtys boldy.
Osy arada, kóptegen elder karantındi birtindep álsiretýde. Izraılde kópshilik jınalatyn merekelerdi ótkizýge ruqsat etildi. Qonaqtar sany 250 adamnan aspaýy tıis, olarǵa maska taǵý keńes berilgen.
Brıtanııada bólshek saýda qaıta bastalǵan alǵashqy jumys aptasynda jıhaz satatyn jáne sharýashylyq dúkenderinde, sondaı-aq ınterer salondarynda satý kólemi birden 42 paıyzǵa artqan.
DDSU qyraǵylyq tanytýǵa shaqyrdy
Juma kúni Tedros Gebreıesýs karantın shekteýlerin alyp otyrǵan barlyq elderdi saq bolyp, karantın alynǵan soń da áleýmettik qashyqtyqty saqtaýǵa shaqyrdy. Dúnıejúzilik densaýlyq saqtaý uıymy koronavırýs pandemııasy «jańa jáne qaýipti kezeńge ótken» dep sanaýda.
«Pandemııa qanatyn keńge jaıǵan, beısenbi kúni DDSU Sovid-19 vırýsyn juqtyrýdyń 150 myńnan astam jańa oqıǵasy týraly aqparat aldy, búginde bul – bir kúndegi eń úlken kórsetkish», - dedi DDSU basshysy.
Onyń aıtýynsha, jańa oqıǵalardyń jartysynan kóbi Amerıkada tirkelgen, Ońtústik Azııa men Taıaý Shyǵysta da indet juqtyrǵan adamdar kóp.
Eýropa jańalyqtary
Irlandııa karantınnen shyǵý protsesin jyldamdatýdy josparlap otyr. Eldiń premer-mınıstri Leo Varadkardyń málimdeýinshe, 29 maýsymda shirkeýler, shashtaraz salondary, teatrlar men kınoteatrlar, sondaı-aq sporttyq zaldar ashylady.
Shveıtsarııada kelesi aptadan bastap myń adamǵa deıin qatysýǵa bolatyn kópshilik sharalardy ótkizýge ruqsat etiletinin málimdedi.
Kıpr elge kirýge qoıylǵan shekteýdi alyp tastap otyr. Endi aralǵa kirýge bolatyn elder arasynda Frantsııa, Italııa jáne Ispanııa, sondaı-aq kórshiles Lıvan bar.
Óz kezeginde, Ýkraına eldiń karantınnen shyǵýynan keıin ınfektsııanyń qaıta órshýi sebebimen birqatar aımaqtarda qaıta shekteý engizýde.
Apta saıyn beretin esebinde Italııa eliniń Densaýlyq saqtaý joǵarǵy ınstıtýty (ISS) álemdegi jaǵdaı jalpy alǵanda pozıtıvti bolǵanymen, vırýs áli de belsendi bolýda.
Esepte álemniń birqatar aımaqtarynan Covid-19 juqtyrýdyń kóptegen jańa oqıǵalary týraly aıtylǵan.
Quramyna Rım qalasy kiretin Latsıo óńirinde indet juqtyrý sany Italııada koronavırýstyń birinshi úlken oshaǵy bolǵan Lombardınııa kórsetkishterinen asqan.
Al Italııa astanasynda sońǵy birneshe kúnde birden eki oshaq anyqtalǵan.
«Osynyń barlyǵy saqtyq sharalaryn saqtaý qajettiligin tanytýda, sebebi eldiń birneshe aýdanynda vırýs áli de keńinen tarap jatyr», - delingen ISS esebinde.
Koronavırýs taraǵan elderdiń arasynda Qytaıdan keıin birinshi turǵan Italııada epıdemııa saldarynan 34500-den astam adam qurban boldy.
Qazirgi kezde jaǵdaı baqylaýǵa alynyp, indet juqtyrǵan adamdardyń sany azaıýda, al bir kúnde qaıtys bolǵandar sany birneshe ondaǵan adam.
Italııa ǵalymdary koronavırýstyń Mılan jáne Týrınniń aǵyndy sýlarynda ótken jyldyń jeltoqsan aıynda, ıaǵnı Italııada Covid-19 dıagnozy qoıylǵanǵa deıin áldeqaıda erterek paıda bolǵanyna sendirýde. Bul birqatar elderdegi keıbir mamandardyń vırýstyń álemde Ýhandaǵy jappaı juqtyrý bastalǵanǵa deıin qanat jaıǵany týraly teorııasyn rastap otyr.
