Dúnıejúzilik densaýlyq saqtaý uıymy Ýhandaǵy vırýs týraly eskertý jasady

NUR-SULTAN. QazAqparat - Dúnıejúzilik densaýlyq saqtaý uıymy Qytaı bıliginen Ýhandaǵy jańa vırýsqa qatysty zertteýlerdiń qalaı júrip jatqany jáne qandaı sharalar qabyldanǵany týraly jedel aqparat berip otyrýdy surady, dep jazady QazAqparat Vox.com-ǵa silteme jasap.

«DDU Ýhandaǵy sharalar týraly mindetti túrde aqparat almasyp otyrýdy suraıdy», delingen agenttik habarlamasynda.

2003 jyly Qytaıda jańa vırýsty pnevmonııa keń taraǵanda memleket aqparatty uzaq ýaqyt jasyrǵany úshin qatań synǵa ushyraǵan bolatyn. Ol kezde vırýsty 8 myń adam juqtyryp, 774 adam qaıtys bolǵan edi.

«Qazirgi tańda jańa vırýs ońtústik Qytaıdaǵy Hýanan jerinde keń taraǵan. Vırýsty kóbine isker azamattar men bazardaǵy satyp alýshylar juqtyrǵan», dep jazady basylym.

Avtordyń aıtýynsha, AQSh-taǵy úsh áýejaıda 17 qańtardan bastap jolaýshylardyń densaýlyǵy tekseriletin bolady.

«Vırýs Taılandtyń eki azamatynan, Japonııanyń bir azamatynan anyqtaldy. Buǵan deıin 2019-nCoV vırýsy janýarlardan adamǵa juǵady dep aıtyldy. Degenmen, DDU jańa vırýsty aýrýǵa shaldyqqandardy saralaı kele jańa vırýs adamnan adamǵa juǵýy múmkin ekenin eskertedi», dep jazady basylym.

Aıta ketý kerek, jańa vırýs týraly 31 jeltoqsanda belgili boldy. Qytaı 5 qańtar kúni jańa vırýs anyqtalǵanyn habarlady.