Dúnıejúzilik densaýlyq saqtaý uıymy tumaýǵa qarsy jańa strategııa ázirledi

ASTANA. QazAqparat - Dúnıejúzinde jyl saıyn 1 mlrd adam tumaýmen aýyrady. 3-5 mln adam onyń aýyr túrine shaldyǵady. Dúnıejúzilik densaýlyq saqtaý uıymy (DDU) tumaýdy jahandyq aýqymdaǵy qaýipti indetterdiń biri dep atap, qaýipti vırýsty emdeıtin jáne aldyn alatyn jańa strategııany usyndy. Ol 2030 jylǵa deıingi kezeńge eseptelgen, dep habarlaıdy QazAqparat BUU saıtyna silteme jasap.

DDU bas dırektory Tedros Adhanom Gebreıesýs tumaý pandemııasynyń búgingi ahýalyna qatysty pikir bildirdi.

«Tumaý pandemııasy qaýpi únemi bolady», - dep málimdedi DDU basshysy. Sondaı-aq, ol tumaý vırýsynyń janýarlardan adamdarǵa berilý qaýpi baryn da atap ótti.

Jyl saıyn tumaýdan 290-650 myń adam qaza taýyp jatyr. Jahandaný, ýrbanızatsııa jáne turǵyndardyń jappaı qonystanýy kelesi pandemııanyń áldeqaıda tez taralýyna ákelip soqtyrýy múmkin.

11 jyldyq Strategııa tıimdi ulttyq baǵdarlamalardy ázirleýdi jáne úsh maqsatqa: maýsymdyq tumaýdyń sanyn azaıtýdy, vırýstyń janýarlardan adamdarǵa berilý qaýpin barynsha azaıtýdy jáne yqtımal pandemııanyń saldaryn jumsartýdy kózdeıdi.

DDU 2002 jyly Madagaskardaǵy tumaý vırýsyn eske saldy. Ol kezde aýyrǵandardyń 2,5 protsenti kóz jumǵan. Buǵan deıin mundaı tumaý pandemııasy 1918-1919 jyldary bolǵan.

Jańa strategııany júzege asyrý úshin jyl saıyn 4,5 mlrd dollar qarjy kerek. Uıym sarapshylary vaktsınalaýdyń tumaýǵa qarsy eń tıimdi qural ekenin eske saldy.