Dúnıejúzilik densaýlyq saqtaý uıymy koronavırýsty pandemııa dep jarııalady
NUR-SULTAN. QazAqparat – Dúnıejúzilik densaýlyq saqtaý uıymy (DDU) jańa koronavırýstyń órshýi pandemııa deńgeıine jetkenin jarııalady. Sebebi vırýs kóptegen elde jáne qurlyqtarda tarap úlgerdi, dep habarlaıdy QazAqparat VVS-ǵa silteme jasap.
«Buǵan deıin koronavırýs týdyrǵan pandemııamen betpe-bet kelgen emespiz. Jáne baqylaýda ustaýǵa bolatyn pandemııamen eshqashan kúresken emespiz. [...] 114 elde tirkelgen 118 myń jaǵdaıdyń 90 paıyzdan astamy tórt memlekette anyqtalyp otyr. Onyń ekeýinde – Qytaı jáne Ońtústik Koreıada syrqattanǵandar sany aıtarlyqtaı azaıdy», - dep málimdedi DDU.
DDU basshysy Tedros Adhanom Gebreıesýstiń aıtýynsha, COVID-19 taralýynyń jańa klassıfıkatsııasy jańa koronavırýspen qalaı kúresý kerektigi týraly usynystarǵa ózgeris engizbeıdi.
«Jaǵdaıdy pandemııa dep jarııalaý DDU-nyń atalmysh koronavırýstan keletin qaýiptiń baǵalaýyn esh ózgertpeıdi. Bul, DDU jasap jatqan sharalarǵa jáne elder jasaýy tıis sharalarǵa áser etpeýi tıis», - delingen uıymnyń aqparatynda.
Osy rette, T. Gebreıesýs el úkimetterin «shuǵyl ári agressıvti sharalar» qabyldaýǵa úndedi.
Al DDU-nyń Facebook-tegi resmı paraqshasy nda keltirilgen uıym basshysynyń sózine súıensek, aldaǵy kúnderi vırýstyń órshýi kútilip otyr.
«Aldaǵy taıaý kúnderi jáne taıaý aptada COVID-19-ti juqtyrý faktileri, ólim jaǵdaılary jáne zardap shekken elder sany budan da artatynyn boljap otyrmyz. DDU bul indetke táýlik boıy baǵalaý júrgizýde jáne biz onyń taralý jyldamdyǵyna , aýyrlyǵyna, sondaı-aq sharasyz otyrýdyń qýipti deńgeıine alańdaýshylyq bildiremiz. Sondyqtan, COVID-19-da pandemııa dep mıpattaýǵa bolady degen baǵalaý jasadyq», - dedi T. Gebreıesýs.
Dúnıejúzilik densaýlyq saqtaý uıymynyń termınologııasyna sáıkes, epıdemııa – aýrýdyń bir óńirde kenetten taraýy. Al pandemııa – aýrýdyń álem boıynsha beleń alýy.
11 naýryzdaǵy jaǵdaı boıynsha, koronavırýsty 118 elde 118 140 adam juqtyrdy, 4293 adam kóz jumdy.
