Dúnıejúzilik boks serııasy: Vasılıı Levıt qarsylasyna ese jiberip aldy

Aıta keterligi, boks qaýymdastyǵynyń reıtıngi boıynsha Astanadaǵy sharshy alańda kezdesken eki bylǵary qolǵap sheberi de álemniń úzdik boksshysy sanalady. Sondyqtan da, bul búgingi fınaldyq jekpe-jektiń eń qyzyqty kezdesýi boldy dep aıtsaq artyq emes. Degenmen, aqtyq aıqasta qazylyq etýshi tóreshilerdiń bura tartqanyn da baıqaǵandaımyz. Óıtkeni, kezdesýde Vasılıı Levıttiń soqqylary dóp tıip, Erıslandı Savon Kotılladan áldeqaıda basymyraq bolǵan tárizdi edi. Alaıda, úsh tóreshiniń esebi boıynsha upaıy sanymen «kýbalyq qabylan» jeńisti qanjyǵasyna baılap ketti. Atap aıtqanda, qaptaldaǵy tóreshilerdiń ekeýi 47-48 upaımen Savon Kotıllaǵa jeńisti berse, bir tóreshi 49-46 esebimen Levıt jeńdi dep sanaǵan. Osylaısha, eki sýdıanyń qorytyndy esebi boıynsha tóreshiler jalpy esepte kýbalyq jeńdi degen sheshimge kelip otyr. Aıta keterligi, bul «Dáýlet» sport keshenine jınalǵan jankúıerlerdiń narazylyǵyn týdyrǵan bolatyn. Jankúıerlerdiń basym bóligi qazaqstandyq boksshynyń jekpe-jekte basym bolǵanyn alǵa tartady. Eske sala keteıik, buǵan deıingi kezdesýlerde Temirtas Júsipov jeńiske jetse, Qaırat Eralıev qarsylasyna ese jiberip aldy. Budan keıin, «Astana arlandarynyń» kapıtany Samat Báshenov, sosyn Meıirim Nursultan da kýbalyq qabylandardy bet qaratpady.