Dúnıejúzilik boks serııasy: «Astana arlandary» 3:1 esebimen alǵa shyqty
ASTANA. QazAqparat - Astanada ótip jatqan Dúnıejúzilik boks serııasynyń (WSB) boıynsha «Astana arlandary» men «Kýba Domadores» arasyndaǵy fınaldyq kezdesýde 75 kelide óner kórsetken jerlesimiz Meıirim Nursultanov Arlen Lopes Kardonany tize búktirdi. Osylaısha tıtýldy kýbalyq boksshy Meıirim Nursultanovqa qarsy esh aıla jasaı almady.
Bul jekpe-jek te asa tartysty ótti. Bastypqyda kýbalyq bylǵary qolǵap sheberi sharshy alańda basymdyq kórsetkenimen, keıinnen Meıirim Nursultanov óziniń osal boksshy emes ekenin dáleldegen. Nátıjesinde úsh tóreshiniń (48-47; 48-47; 48-47;) esepteri boıynsha qazaqstandyq jeńiske jetti. Eske sala keteıik, buǵan deıingi kezdesýlerde Temirtas Júsipov jeńiske jetse, Qaırat Eralıev qarsylasyna ese jiberip alǵan bolatyn. Budan keıin, «Astana arlandarynyń» kapıtany Samat Báshenov te kýbalyqtan basym tústi.
