Dúnıejúzilik bodıbıldıng federatsııasynyń basshysy Sıngapýrda ótken taı boksynan jekpe-jekte kóz jumdy
ASTANA. QazAqparat - Sıngapýrda Jaýyngerlik ónerden Azııa chempıonaty kezinde kórermenderdiń qyzyǵýshylyǵy úshin kásibı emes adamdar arasynda ótkizilgen taı boksynan jekpe-jekte qarsylastardyń biri qaza tapty, dep habarlaıdy reseılik TASS agenttigi.
Uıymdastyrýshylardyń málimetinshe, Dúnıejúzilik bodıbıldıng federatsııasynyń prezıdenti Pradıp Sýbramanıan jekpe-jek kezinde alǵan jaraqatynan jergilikti aýrýhanalardyń birinde kóz jumǵan.
Belgilisi, aıqas tóreshi sheshimimen 32 jastaǵy Sýbramanıannyń tehnıkalyq nokaýtyna baılanysty toqtatylǵan. Onyń komandasynyń múshelereniń aıtýynsha, sportshynyń jaǵdaıy asa aýyr bolmaǵan. Jekpe-jekten soń sportshy dereý aýrýhanaǵa jetkizilgen, bir saǵattan keıin ol qaıtys bolǵan.
Aıqas Sıngapýrdaǵy elıtalyq mekemeniń biri - bes juldyzdy «Marına beı sends» qonaq úıinde ótokizilgen. Bastapqyda qarsylastar retinde 41 jastaǵy bloger Stıven Lım men tanymal sıngapýrlyq ánshi Sılvester Sım belgilengen. Alaıda eki kún qalǵanda ánshi saqtandyrý kompanııasymen kelise almaǵandyqtan aıqastan bas tartqan. Osy kezde Sýbramanıan sharshy alańǵa shyǵýǵa ózin usynǵan.
Marqumnyń týystarynyń aıtýynsha, sportshy bodıbıldıng jáne paýerlıftıngimen kásibı turǵyda aınalysqan, keıingi úsh aıda jaýyngerlik ónerge qyzyǵýshylyq tanytqan. Onyń qarsylasy da kásibı aıqasshy emes. Sondaı-aq, jekpe-jek te taı boksynyń jeńildetilgen erejesi boıynsha ótkizilgen.
