Dúnıejúzilik bıznes-keńes «Báıterek» holdınginiń ınfraqurylymdyq jobalar boıynsha bastamalaryn baǵalady
Onyń jumysyna «Báıterek» ulttyq basqarýshy holdıngi» AQ Basqarýshy dırektory-Basqarma múshesi Dınara Seıdjaparova qatysty.
Dınara Seıdjaparova Qazaqstannan jáne TMD elderinen keńes jumysyna qatysqan jalǵyz ókil boldy. Jumys barysyndaǵy kezdesý sheńberinde Keńes qatysýshylary Qazaqstandaǵy turǵyn úımen qamtamasyz etý ınfraqurylymdy damytý jobalaryn qarjylandyrý boıynsha «Báıterek» ulttyq basqarýshy holdıngi» AQ bastamalaryn baǵalady. Dál osyndaı jobalar ekonomıkanyń turaqty damýyna járdemdesetin bolady, dep habarlady atalmysh holdıngtiń baspasóz qyzmeti.
«Keńes otyrysy pikirtalas formatynda ótýde, ondaǵy basty maqsat keńestiń kedeılik, áleýmettik teńsizdik jáne qorshaǵan ortany qorǵaý problemalaryn sheshýde mańyzdy ról atqaryp otyrǵandyǵyn álemdik bıznes-qaýymdastyǵy nazaryna jetkizý bolyp tabylady»,- deıdi Dınara Seıdjaparova.
Dúnıejúzilik bıznes-keńes quramyna 33 múshe kiredi, olardyń ishinde aty álemge belgili sıngapýrlyq iri qarjy qyzmetkeri, «Temasek Holdings» jetekshisi Ho Chın, qytaılyq kásipker, «Alibaba Group» kompanııasynyń negizin qalaýshy Djek Ma, «Mars Incorporated» prezıdenti jáne bas atqarýshy dırektory, sondaı-aq Unilever prezıdenti Pol Polman syndy bıznes-elıta ókilderi bar.
Keńes otyrysy barysynda «Úzdik naryq. Úzdik qarjylandyrý. Úzdik jumys orny» («Better Markets. Better Finance. Better Jobs») jobasy talqylandy. Atqarylǵan jumystyń nátıjeleri 2017 jylǵy qańtarda Davostaǵy Dúnıejúzilik ekonomıkalyq forýmyna usynylatyn bolady.
Turaqty damý jónindegi dúnıejúzilik bıznes-keńesi - ol qarjylandyrýdyń jańa úlgilerin pysyqtaý, sondaı-aq 2030 jylǵa deıin turaqty damý maqsattaryna qol jetkizý boıynsha bastamalardy qurý úshin bıznes, akademııalyq qaýymdastyq jáne memlekettik qurylymdar ókilderiniń basyn qosatyn ǵalamdyq alań.
