Dúnıejúzilik bıologııalyq qaýipsizdik máselelerin qaraıtyn agenttik qajet – Kúnsulý Zakarıa

ASTANA. QazAqparat – Dúnıejúzilik bıologııalyq qaýipsizdik máselelerin qaraıtyn agenttik qajet. Bul týraly Astana halyqaralyq forýmynda Qazaqstan Prezıdenti janyndaǵy Ǵylym akademııasynyń basshysy Kúnsulý Zakarııa aıtty, dep habarlaıdy QazAqparat tilshisi.

«Álemde de, bizdiń elimizde de antıvakserler boldy. Ony barlyǵyńyz bilesizder. Bul másele Qazaqstannyń ishinde bolǵanymen asa úlken aýqymda bolǵan joq. Sebebi saýatty, bilimdi azamattar vaktsınanyń 200 jyldan beri paıdalanylyp, qanshama adamnyń ómirin saqtap qalǵanyn aıtyp, halyqqa túsindirý jumystaryn júrgizdi, BAQ arqyly aqparat berdi», - dedi ǴA prezıdenti.

Kúnsulý Zakarıa COVID-19 sońǵy bir ǵasyrdyń ishinde oryn alǵan iri pandemııa ekenin, álem halqy oǵan daıyn bolmaǵanyn basa aıtty.

«Endi osy pandemııanyń saldaryn umytyp, aýyrtpalyq artta qaldy demeı, kerisinshe, ótken indetten sabaq alýymyz kerek», - dedi ǵalym.

Ol jaqynda ǵana QazBioPharm «Pandemııa sabaqtary jáne Qazaqstan tájirıbesi» taqyrybynda forým ótkizgenin eske aldy.

«Endi bizde sol pandemııanyń sabaqtary, erejeleri bar. Ony saqtap qalýymyz kerek. Prezıdent Qasym-Jomart Toqaev aýqymdy forýmdarda Dúnıejúzilik bıologııalyq qaýipsizdik agenttigin qurý jáne osy máseleni joǵary deńgeıge shyǵarý týraly birneshe ret aıtty. Biraq, ókinishke qaraı, úlken jumystardyń qolǵa alynǵanyn kórip turǵan joqpyn. Osy suraqty umytpaýymyz kerek. Bizge dúnıejúzilik bıologııalyq qaýipsizdik máselelerin qaraıtyn agenttik qajet», - dedi Kúnsulý Zakarıa.