Dúnıejúzilik banktiń basshysy bolyp amerıkandyq Djım En Kım taǵaıyndaldy
ASTANA. 18 sáýir. QazAqparat - Dúnıejúzilik banktiń Dırektorlar keńesi uıymnyń basshysy laýazymyna AQSh ókili, Darmýt kolledjiniń prezıdenti Djım En Kımdi taǵaıyndady.
Kım jańa qyzmetine 2012 jyldyń 1 shildesinen bastap kirisetin bolady, ol DB basshysy qyzmetine bes jylǵa saılandy, dep habarlaıdy Birinshi arna Eýrazııa .
RIA Novostı habarlaǵandaı, Dúnıejúzilik banktiń qazirgi basshysy Robert Zellık qyzmettik laýazymyn 30 maýsymda besjyldyq merzimi aıaqtalǵannan keıin bosatady. «Biz barlyq kandıdattarǵa úlken rızashylyǵymyzdy bildirgimiz keledi. Djım En Kımniń óz qyzmetine kirisýi men onymen yntymaqtastyqta jumys bastaýdy taǵatsyzdana kútemiz», - delingen Dúnıejúzilik banktiń Dırektorlar keńesiniń málimdemesinde.
Esterińizge sala keteıik, 13 sáýirde Reseı qarjy mınıstri Anton Sılýanov Máskeý Djım En Kımniń kandıdatýrasyn qoldaıtynyn málimdegen bolatyn. 24 naýryzda Dúnıejúzilik bank uıym basshysy laýazymyna kandıdattardyń resmı tizimin jarııalady. Onyń ishinde, Kımnen bólek, Kolýmbııanyń burynǵy qarjy mınıstri Hose Antonıo Okampo jáne Nıgerııanyń qarjy mınıstri Ngozı Okondjo-Iveala da boldy. Burynyraq habarlanǵandaı, BRIKS (Brazılııa, Reseı, Úndistan, Qytaı jáne Ońtústik Afrıka) elderi DB basshysy qyzmetine jalǵyz kandıdatýra usyna alatyn, alaıda ondaı usynys bolǵan joq.
