Dúnıejúzilik bank sarapshylary Eńbek daǵdylaryn damytý jobasyna oń baǵa berdi
NUR-SULTAN. QazAqparat – Halyqaralyq qaıta qurý jáne damý bankiniń (Dúnıejúzilik bank) Nur-Sultandaǵy mıssııasy aıasynda qarjy uıymy sarapshylary men QR Eńbek jáne halyqty áleýmettik qorǵaý mınıstrligi ókilderiniń arasynda kópjaqty birqatar kezdesý ótti, dep habarlaıdy atalǵan vedomstvonyń baspasóz qyzmeti.
Shetelden kelgen qonaqtar 550 kásibı standarttardyń negizinde jańartylatyn Qazaqstandaǵy bilim berý baǵdarlamalarynyń ázirlenýi men jańartylýy aıaqtalýyn joǵary baǵalady.
2016 jyldan bastap eńbek mınıstrligi Dúnıejúzilik banktiń qarjylyq jáne tehnıkalyq qoldaýymen jumyspen qamtýdy jaqsartýǵa jáne kadrlardy oqytýdyń tıimdiligin arttyrýǵa baǵyttalǵan «Eńbek daǵdylaryn damytý jáne jumysqa yntalandyrý» jobasyn júzege asyryp kele jatqany belgili. Aıaqtalýǵa taıaǵan jobany iske asyrýdyń mártebesin jáne belgilengen kórsetkishterge qol jetkizýin baǵalaý úshin, Qazaqstannyń astanasyna HQDB-nyń bilim berý praktıkasy boıynsha basqarýshy Garrı Patrınos jáne bilim berý boıynsha jetekshi mamany Aleksandr Valerıo keldi.
«Jobanyń mindetteriniń biri – naryqtyq talaptarǵa sáıkes keltirilgen biryńǵaı kásibı, bilim berý jáne biliktilik standarttarynyń qol jetimdiligi men qoldanylýyn qamtamasyz etetin, eńbek naryǵyn ońtaılandyratyn jáne qalyptastyratyn ulttyq biliktilik júıesin damytý úshin negiz qurý bolyp tabylady. Osy maqsatta joba aıasynda ekonomıkanyń suranysqa ıe 12 salasy úshin 550 kásibı standart ázirlendi, olardyń 70-i bekitildi, al taǵy 480-i jyldyń sońyna deıin bekitmek. Biz bul jumystyń belgilengen merzimde jáne sapaly júrgizilip jatqanyna rızashylyǵymyzdy bildiremiz», – dedi Garrı Patrınos.
Mıssııa qatysýshylary eńbek mınıstrliginiń ókilderimen bekitilgen kásibı standarttarmen, ıaǵnı eńbek naryǵynyń talaptaryna sáıkestendiriletin bilim berý baǵdarlamalaryn aldaǵy ýaqytta jandandyrý máselelerin talqylady.
Dúnıejúzilik bank mamandarynyń Nur-Sultanǵa sapary aıasynda jumyspen qamtý ortalyqtarynyń (JQO) jumysymen, onyń qyzmetkerlerine arnalǵan oqý baǵdarlamalaryn jáne talapkerlerge usynylatyn biliktilikti arttyrý kýrstarymen tanysty. Joba sheńberinde JQO-nyń materıaldyq-tehnıkalyq jabdyqtalýy buǵan deıin jaqsartylǵan bolatyn, atap aıtqanda olar zamanaýı IT jabdyqtarmen qamtamasyz etilgen, al 2020 jyly odan ári jańǵyrtý josparlanýda.
Mıssııa odan ári ózara árekettesýdiń mańyzdy aspektilerin naqtylaýǵa múmkindik týǵyzyp otyr. Ulttyq biliktilik júıesin damytý boıynsha eńbek mınıstrligi usynǵan sharalar eń tıimdi bilim berý baǵdarlamalaryn ázirleý barysynda yqpal etetin bolady. Qazirdiń ózinde QR Bilim jáne ǵylym mınıstrligimen yntymaqtastyq tetigi pysyqtalyp jatyr. 2020 jyldyń ortasyna qaraı qazaqstandyq bilim berý uıymdarynda jańartylǵan bilim berý standarttary engiziledi dep kútilýde, bul jumys berýshilerdiń talaptaryna sáıkes keletin jańa kadrlardy eńbek naryǵyna shyǵarýǵa múmkindik beredi.
Mıssııa qorytyndysy boıynsha Dúnıejúzilik bank ókilderi jobany iske asyrý tıimdiliginiń berilgen aralyq kórsetkishterine qol jetkizgenin atap ótip, jumystyń nátıjeli qarqynyn odan ári qoldaýǵa úmit bildirdi.
