Dúnıejúzilik bank munaı baǵasynyń boljamyn barreline 37-den 41 dollarǵa deıin ósirdi
ASTANA. QazAqparat - Dúnıejúzilik bank 2016 jylǵy óziniń munaı baǵasy boljamyn barreline 37-den 41 dollarǵa deıin arttyrdy. Bul týraly uıym habarlamasynda aıtylǵan, dep jazady Lenta.ru.
«Biz jyl ishinde energııa kózderine baǵa joǵarylaıdy, dep kútemiz, óıtkeni mol usynystar kezeńinen keıin naryqtaǵy tepe-teńdik qalpyna keldi», - dep atap ótti aǵa ekonomıst Djon Baffes.
Degenmen, onyń pikirinshe, eger OPEK óndiristi edáýir ulǵaıtatyn bolsa jáne OPEK-ke kirmeıtin elderde óndiris kútkendegideı jyldam tómendemeıtin bolsa, energııa kózderine baǵalar munan da quldyraýy múmkin.
Beısenbi kúni, 26 sáýirde Londonnyń ICE bırjasynda Brent markaly munaı baǵasy barreline 45 dollardan asty. Al etalondyq sorttyń baǵasy 45,8 dollardy qurady.
17 sáýirde Katar astanasy - Dohada munaı óndirýshi elder ókilderiniń kezdesýi ótti. Taraptar kómirsýtekterge baǵanyń odan ári tómendeýine jol bermeý úshin munaı óndirýdi shekteý týraly kelisimge qol qoıady, dep kútilgen edi. Alaıda mámile jasalmady - Saýd Arabııasy Irannyń qatysýynsyz qandaı da bir qujatqa qol qoıýdan bas tartty. Al Islam Respýblıkasynyń ókilderi Dohaǵa kelgen joq.
