Dúnıejúzilik bank Qazaqstannyń mal sharýashylyǵyn damytýǵa qarjy bóledi
ASTANA. QazAqparat - Dúnıejúzilik bank Qazaqstandaǵy mal sharýashylyǵyn damytý úshin qarajat bólýge daıyn, dep habarlaıdy QazAqparat tilshisi.
Bul týraly QR Úkimetinde Dúnıejúzilik bank ókilderiniń qatysýymen ótken dóńgelek ústelde Qazaqstandaǵy Dúnıejúzilik banktiń turaqty ókili Ato Braýn málimdedi.
«Fermerlerdi jáne bıznestiń keıbir segmentterin tikeleı qarjylandyrýda Sizderge kómektese alamyz. Bastapqyda jarty mıllıard dollarǵa kelisken bolatynbyz, aldaǵy 5 jylda júzege asyramyz degen oıdamyn. Qajetti qarjylyq jáne tehnıkalyq qoldaý boıynsha memleketten usynys alǵan soń, qarjylandyrýdyń egjeı-tegjeıin talqylaǵymyz keledi. Sol kezde qarjylandyrýdyń naryqtyń túrli segmentterine qalaı bólinetini týraly tolyqqandy sóılesemiz. Et odaǵymen de óńirlerdegi úı sharýashylyqtary, mal jemdeıtin oryndar týraly áńgimelese alamyz jáne sıyr men qoı etteri boıynsha baǵdarlama quramyz», - dedi Ato Braýn.
Óz kezeginde Qazaqstandaǵy et odaǵynyń bas dırektory Maqsut Baqtybaev halyqaralyq uıym bóletin qarajattyń qaıda jumsalatynyn aıtty.
«Oǵan jáı qarajat emes, jańa bilim men jańa naryqtarǵa jol ashatyn múmkindik dep qaraǵan jón. Sondyqtan, qarajatty eń aldymen jeke fermerlerdi qarjylandyrý baǵdarlamasyna jumsaımyz. Josparymyzdaǵy ekinshi baǵyt - sýarmaly jer kólemin qosymsha mıllıon gektarǵa ulǵaıtý. Osylaısha, turaqty jem-shóp bazasyn jasaı alamyz», - dedi M. Baqtybaev.
