Dúnıejúzilik bank Qazaqstannyń aýyl sharýashylyǵy júıesin reformalaýǵa grant bóledi

NUR-SULTAN. QazAqparat - Aýyl sharýashylyǵy mınıstri Erbol Qarashókeevtiń AQSh astanasy Vashıngtonda ótken Dúnıejúzilik bank basshylyǵymen kezdesý qorytyndysy boıynsha taraptar Dúnıejúzilik Banktiń aýyl sharýashylyǵyn damytýǵa qoldaý kórsetý baǵdarlamasy (tehnıkalyq kómek) boıynsha yntymaqtastyq týraly ýaǵdalasty, dep habarlaıdy QazAqparat.

Dúnıejúzilik bank múddeli elderge olardyń aǵymdaǵy saıasatyn qaıta qaraý jáne qaıta baǵdarlaý jáne aýyl sharýashylyǵyn qoldaý turǵysynda júzege asyrylatyn jáne naqty nusqalardy baǵalaýǵa qoldaý kórsetý úshin tehnıkalyq kómek baǵdarlamasyn qurdy.

Baǵdarlama qazirdiń ózinde 13 elmen analıtıkalyq jumysta qoldaý kórsetý jáne reformalardyń tehnıkalyq, ekonomıkalyq jáne áleýmettik turǵydan júzege asyrylatyn nusqalaryn usyný úshin yntymaqtastyq ornatty. Aýyl sharýashylyǵy saıasatyn qaıta qurý boıynsha kómek aıasynda bank turaqty aýyl sharýashylyǵyna kóshý boıynsha kúsh-jigerdi jumyldyrý maqsatynda jahandyq habardarlyqty arttyrý jáne konsensýs qalyptastyrý úshin joǵary deńgeıdegi saıası dóńgelek ústelder uıymdastyrady.

Aýyl sharýashylyǵy mınıstri Erbol Qarashókeev Dúnıejúzilik bank basshylyǵymen kezdesýde 2021-2025 jyldarǵa arnalǵan AÓK damytýdyń Ulttyq jobasynyń basymdyqtary negizinde aýyl sharýashylyǵynyń ósýine, qorshaǵan ortaǵa áserdi barynsha azaıtýǵa jáne azyq-túlik qaýipsizdigi men tamaqtaný salasynda neǵurlym joǵary nátıjelerge qol jetkizýge baǵdarlanǵan ornyqty agrarlyq azyq-túlik júıesin qurýdy qoldaýǵa baǵyttalǵan granttyq qarajat esebinen Qazaqstanǵa 2 jylǵa eseptelgen tehnıkalyq kómek kórsetý máselelerin talqylady.

Tehnıkalyq kómek sheńberinde halyqaralyq sarapshylar QR Aýyl sharýashylyǵy mınıstrligimen birlesip, osy saladaǵy halyqaralyq tájirıbeni eskere otyryp, sýbsıdııalaý júıesine tereń taldaý júrgizedi, memlekettik qoldaýdyń tıimdi sharalary usynylady, qarjylyq qoldaý kórsetýge járdem kórsetiledi.

Sondaı-aq, klımattyń ózgerýin, Qazaqstannyń keıbir bóliginiń qýańshylyqqa ushyraýyn nazarǵa ala otyryp, Dúnıejúzilik bank onyń aýyl sharýashylyǵyna áserin azaıtý, basqarý jáne saldaryn jumsartý boıynsha tıimdi strategııa ázirleý jóninde birqatar usynymdar ázirledi.

Qazaqstandyq taraptyń sendirýi boıynsha, bul usynymdardy barlyq múddeli organdardyń tarapynan muqııat zerdelenetin bolady.

Taraptar tehnıkalyq kómek sheńberinde oń nátıjelerge qol jetkizýge beıildiligin rastady, sondaı-aq baılanystardyń joǵary dınamıkasyn qoldaýǵa kelisti.