Dúnıejúzilik bank Qazaqstandaǵy landshaftardy qalpyna keltirý jobasyna qarajat bóldi
Bul joba Jahandyq ekologııalyq qor baǵdarlamasy aıasynda Dúnıejúzilik bank tarapynan 4,3 mln AQSh dollaryna qarjylandyryldy. Ol 2021-2025 jyldary iske asyrylmaq.
«Joba orman sharýashylyǵyn damytý máselelerin qozǵaıdy, fermerlermen jáne jergilikti qoǵamdastyqtarmen tozǵan jerlerdi orman ósirý arqyly qalpyna keltirý jumystaryn kózdeıdi. Onyń aıasynda Qyzylorda oblysyndaǵy Aral teńiziniń qurǵatylǵan túbindegi 300 myń ga memlekettik orman qory jerleri kartaǵa túsiriledi, qosymsha 50 myń ga orman ósirý úshin jobalaý-izdestirý jumystary júredi. Qyzylorda jáne Túrkistan oblystarynda 100 myń ga alqapta esepke alynbaǵan ormandar túgendeledi.
Qyzylorda oblysynyń Qazaly orman mekemesinde jyl saıynǵy ónimdiligi 4 mln dana sekseýilge jetetin, kóshet alańy 33 ga bolatyn orman tálimbaǵy qurylady. Sondaı-aq, Qyzylorda qalasy aınalasynda 3 myń ga bolatyn Jasyl aımaq qurylady», - dep túsindirdi QR EGTRM Orman sharýashylyǵy jáne janýarlar dúnıesi komıteti.
Sonymen birge, Şýchınsk qalasyndaǵy «Respýblıkalyq orman selektsııalyq-tuqym ósirý ortalyǵy» RMQK bazasynda orman tuqymdarynyń genetıkalyq banki qurylady. Jambyl oblysynyń Qosqudyq orman mekemesi jáne Qyzylorda oblysynyń Qazaly orman mekemesi úshin Orman sharýashylyǵy tehnıkasy men jabdyqtaryn satyp alý sharalary qarastyrylǵan.
«Bul jobany iske asyrý respýblıkanyń ormanyn arttyrýǵa, Qyzylorda jáne Jambyl oblystarynyń orman mekemeleriniń materıaldyq-tehnıkalyq bazasyn nyǵaıtýǵa yqpal etedi dep kútilýde. Óz kezeginde Qyzylorda qalasynyń aınalasynda jasyl aımaq qurý jeldiń teris áserin, jerdiń tozýyn azaıtady jáne óńirdiń ekologııalyq jaǵdaıyn jaqsartady. Jalpy, atalǵan barlyq sharalar Memleket basshysynyń 2 mlrd aǵash otyrǵyzý jónindegi tapsyrmasyn oryndaý aıasynda orman sharýashylyǵy jumystaryn sapaly júrgizýge múmkindik beredi», - deıdi komıtet.
