Dúnıejúzilik bank Qazaqstanda Ónimdi ınnovatsııalardy yntalandyrý jobasyna qoldaý bildiredi - Senat
ASTANA. QazAqparat - Búgin Parlament Senatynyń jalpy otyrysynda «Qazaqstan Respýblıkasy men Halyqaralyq Qaıta Qurý jáne Damý Banki arasyndaǵy Qaryz týraly kelisimdi (Ónimdi ınnovatsııalardy yntalandyrý jobasy) ratıfıkatsııalaý týraly» QR Zańy qabyldandy.
Atalǵan kelisim Qazaqstandaǵy joǵary sapaly, ózekti zertteýler júrgizýdi, tehnologııalardy kommertsııalandyrýdy yntalandyrady. Bul rette elimizde qyzmet etip jatqan ǵylymı-zertteý ınstıtýttary, jobalaý bıýrolary men ınjenerlik jáne ǵylymı beıindegi zerthanalar arasyndaǵy yntymaqtastyqpen baılanysty quqyqtyq qatynastarǵa qoldanylady.
Tutastaı alǵanda Ónimdi ınnovatsııalardy yntalandyrý jobasy ınnovatsııalar úshin bilim bazasyn damytý, ınnovatsııalyq konsortsıýmdar, tehnologııalardy kommertsııalandyrý tsıklin shoǵyrlandyrý, ulttyq ınnovatsııalyq júıeni shoǵyrlandyrýdy kúsheıtý sekildi bólikterden turady. Sonymen qatar, Ónimdi ınnovatsııalardy yntalandyrý jobasy aldaǵy bes jyldyq kezeńdi qamtıdy.
Bilim jáne ǵylym mınıstri Aslan Sárinjipovtyń aıtýynsha, jobanyń birinshi baǵytynda ınnovatsııalar úshin ǵylym bazasyn damytý qarastyrylady. Onyń ishinde ǵylymı toptarǵa arnalǵan grant qamtylady. Ǵylym, óndiris jáne memleket múmkindikterin biriktiretin arnaıy konsortsıýmdar qurylatyn bolady. «Ónimdi ınnovatsııalardy yntalandyrý jobasy birneshe quramdastardan turady. Onyń ishinde birinshi quramdas aıasynda 30 mln. dollar bólinedi, bul ınnovatsııalyq-engiziletin jobalardy qarjylandyrýǵa baǵyttalady. Bul úshin júzge tarta jobalar iriktelip alynady. Qarjylandyrý somasy 4 myń dollardan bastalady bolady. Ondaǵy maqsat - ǵylymı jobalardy tájirıbelik, pılottyq, ónerkásiptik óndiristik deńgeıge shyǵarý. Jobalar JOO-lar, zertteý ınstıtýttary men ınnovatsııalyq kompanııalar arasynda ashyq konkýrstar negizinde irikteledi», - dedi mınıstr.
Onyń aıtýynsha, táýelsiz irikteý men odan keıingi monıtorıngti qamtamasyz etý maqsatynda ǵylym men kommertsııalaý jónindegi halyqaralyq keńes qurylady, onyń quramyna bes sheteldik ǵalymdar men jergilikti ókilder kiredi. Al tehnıkalyq saraptamalar júrgizý jumystary Memlekettik ǵylymı-saraptamalyq ortalyq bazasynda júzege asyrylady.
Jalpy alǵanda Kelisimge sáıkes, Halyqaralyq Qaıta Qurý jáne Damý Banki Qazaqstanǵa Ónimdi ınnovatsııalardy yntalandyrý jobasyn qarjylandyrýǵa 88 mıllıon AQSh dollary somasynda qaryz beredi. Atalǵan qaryzdyń óteý merzimi bes jyldyq jeńildik kezeńdi qosa alǵanda 15 jyldy quraıdy. Tólenýge tıisti birjolǵy komıssııa qaryz somasynyń 0,25 paıyzyna teń. Tutastaı alǵanda, jobany iske asyrý ǵylymı óndiristik baılanysty yntalandyryp, tehnologııalyq ınkýbatsııalyq tsıklin damytý arqyly ınnovatsııalardy damytýǵa jol ashady. Ónimdilikti arttyrýǵa jáne ekonomıkanyń básekege qabiletti bolýyna yqpal etedi.
Parlament qabyldaǵan zań Memleket basshysynyń qol qoıýyna joldanady.
