Dúnıejúzilik bank «Batys Eýropa-Batys Qytaı» jobasy boıynsha salynatyn jol qurylysyna óz tarıhynda asa qomaqty qarjy bólip otyr
ASTANA. Maýsymnyń 15-i. QazAqparat /Qanat Mámetqazyuly/ - Dúnıejúzilik bank «Batys Eýropa-Batys Qytaı» jobasyna 2 mlrd. 150 mln. dollar jumsaıdy. Atalǵan bank óz tarıhynda bir memleket aıasynda salynatyn jol qurylysyna munshalyqty qomaqty qarjy bólmegenin málimdegen. Búgin jýrnalısterge arnap ótkizilgen baspasóz máslıhatynda QR Kólik jáne kommýnıkatsııa mınıstri Ábilǵazy Qusaıynov osylaı málim etti,
dep habarlaıdy QazAqparat.
Mınıstrdiń aıtýynsha, «Batys Eýropa-Batys Qytaı» jobasy aıasynda Qazaqstannyń Kólik mınıstrligi Qytaı Halyq Respýblıkasymen memorandým jasasqan, óıtkeni atalǵan joba boıynsha negizgi júk tasymaly osy eldiń enshisine tıedi. Reseı tarapynda da joldyń júzege asýy úshin sol elmen memorandým jasaldy. Budan bólek, eýropada shtab-páteri ornalasqan Halyqaralyq avtotransportshylar uıymymen kelisim jasalǵan.
«Batys Eýropa-Batys Qytaı» dálizin júzege asyrý úshin qarajat salǵan barlyq bankter, atap aıtqanda Dúnıejúzilik bank, Eýropalyq bank, Islam banki, Azııa banki, sondaı-aq Japon banki jobaǵa úlken qyzyǵýshylyq tanytqan bolatyn. Bul jerde memleket basshysynyń bedelin de aıta ketý kerek. Sondaı-aq atalǵan bankter kelissózdiń birinshi kúni-aq bizge qoldaý jasady. Daǵdarys kezeńinde bundaı jobaǵa aýqymdy qarajat bólý, sırek kezdesetin qubylys», dedi Á. Qusaıynov.
Onyń aıtýynsha, Dúnıejúzilik bank óz tarıhynda bir memleket aıasynda salynatyn jol qurylysyna munshalyqty qomaqty qarjy bólmegenin, naqty aıtqanda 2 mlrd. 150 mln. dollar jumsamaǵanyn málimdegen. Al taǵy bir bedeldi bank - Azııa banki de jobaǵa úlken senim bildirip, 760 mln. dollar bólip otyr.
«Daǵdarys jaǵdaıynda bedeldi qarjy ınstıtýttarynyń qoldaýymen mega-jobany júzege asyrý kez kelgen memleket úshin úlken abyroı», dedi mınıstr.
