Dúnıejúzi qazaqtarynyń qaýymdastyǵynda kóshi-qon máseleleri talqylandy

Jıynǵa jınalǵan oralmandar qaýymy kóshi-qon salasyndaǵy kedergilerdi joıý, azamattyq, turaqty qonystaný, arnaıy memleket bekitken óńirlerge qonystaný sııaqty máselelerdi kóterdi.

Áńgime ózegi 2013 jyly jeltoqsanda oralmandar jóninde qabyldanǵan zańda ketken birqatar shıkilikterdi joıý týraly QR Úkimetiniń 22 sáýirdegi qaýlysy jaıly órbidi.

Esterińizge sala keteıik, 2013 jylǵy 10 jeltoqsanda bekitilgen «Qazaqstan Respýblıkasynyń keıbir zań aktilerine eńbek mıgratsııasy máseleleri boıynsha túzetýler men tolyqtyrýlar engizý týraly» Zańǵa sáıkes oralmandarǵa azamattyq Qazaqstanǵa kóship kelgen soń 4 jyldan keıin beriletin bolǵan edi. Al 8 sáýirden bastap Úkimettiń «Oralmandardy jaıǵastyrý óńirlerin aıqyndaý týraly» №248 qaýlysy boıynsha Aqmola, Atyraý, Batys Qazaqstan, Qostanaı, Pavlodar, Soltústik Qazaqstan jáne Shyǵys Qazaqstan oblystarynan ózge óńirlerge kelgen etnıkalyq qazaqtarǵa oralman mártebesin berý toqtatylǵan.

22 sáýirde QR Eńbek jáne halyqty áleýmettik qorǵaý mınıstri Tamara Dúısenova óz málimdemesinde bul aımaqtardan ózge jerlerge kelgen etnıkalyq qazaqtarǵa «shetel azamaty retinde tólem qabiletin rastaýy» týraly shekteý alynyp tastalatyn aıtqan edi.

Mınıstr hanym endi syrttan kelgen qandastarymyzǵa kelesi jyldan bastap Qazaqstannyń qaı óńirine kelse de oralman mártebesi beriletinin jáne 1 jyldyń ishinde azamattyq ala alatynyn jetkizgen.

Jalpy kóshi-qon máselesi boıynsha 22 sáýirde ótken Úkimet otyrysynan keıin QR Eńbek jáne halyqty áleýmettik qorǵaý mınıstrligi janynan quramyna barlyq quzyrly organ ókilderi men Dúnıejúzi qazaqtary qaýymdastyǵy tarapynan tóraǵanyń orynbasary Sultanáli Balǵabaev kiretin arnaıy jumys toby qurylǵan bolatyn. Oralmandar men olardyń otbasy múshelerin beıimdeý jáne yqpaldastyrý tetigin jetildirý jónindegi vedomstvoaralyq jumys toby Qazaqstan zańnamalary men normatıvtik-quqyqtyq aktilerine engiziletin ózgerister men tolyqtyrýlar týraly óz usynysyn mınıstrlikke 5 mamyrǵa deıin tabys etýi tıis bolǵan edi. Endi bul másele Dúnıejúzi qazaqtary qaýymdastyǵynyń osy jıynynan keıin, 15 mamyrda Mınıstrlikter úıinde ótetin jumys tobynyń otyrysynda talqylanbaq.

«Ózderińizdiń qosatyn usynys-tilekterińiz bolsa, qabyldaýǵa ázirmiz. Endi sizder jer-jerdegi aǵaıyndarǵa habarlasyńyzdar, usynystaryńyzdy engizińizder», - dedi Eńbek jáne halyqty áleýmettik qorǵaý mınıstrliginiń Kóshi-qon komıteti tóraǵasynyń orynbasary Aslan Qarjaýbaev.