Dúnıejúzi qazaqtarynyń qaýymdastyǵy oralmandar azamattyǵyna qatysty zańdy tezdetýdi suraıdy

Bul týraly búgin Parlament Májilisi Áleýmettik-mádenı damý komıtetiniń otyrysynda Dúnıejúzi qazaqtarynyń qaýymdastyǵy Tóraǵasynyń orynbasary Talǵat Mamashev málim etti. Otyrysta elimizdegi ishki jáne syrtqy kóshi-qon problemalary talqylanǵan bolatyn.

«Ótken joly Reseı Qyrymdaǵy jaǵdaı aıasynda azamattyq alýǵa qatysty zańdy bir kúnniń ishinde qabyldady. Ol boıynsha ótinish bergen adam bir kúnniń ishinde Reseı azamattyǵyn ala alady. Bul biz úshin de asa qajet tájirıbe. Óıtkeni, Qazaqstannyń kóshi-qon týraly zańnamasyn ózgertý uzaqqa sozylyp ketýi múmkin», - dedi T. Mamashev. Bul rette qaýymdastyq ókili oralmandar máselesine arnalǵan zań jobasynyń sózbuıdaǵa salynyp, uzaqqa sozylyp ketpeýine qatysty depýtattarǵa tilegin bildirdi.

«Májilis depýtattarynan surarym, osy zań jobasyn tezdeteıik. Kezinde oralmandar azamattyǵyna kedergi jasaıtyn osy zańdy da ý-shýsyz bir kúnniń ishinde qabyldadyńyzdar ǵoı, endeshe sondaǵy olqylyqty túzetýdi de bir aıdan asyrmasaq eken», - dedi qaýymdastyq Tóraǵasynyń orynbasary.

Budan bólek, T. Mamashev oralmandardyń kóshi-qonyna qatysty másele kóterip, ásirese kóshi-qon polıtsııasy tarapynan kedergiler shash etekten ekenin alǵa tartty.

«Qazir kelip jatqan oralmandardy qınap júrgen kóshi-qon polıtsııasy. Shetten keletinder úshin kedergiler bolǵanyna qaramastan Atajurtyna asyǵatyndar barshylyq. Al solardyń ózine túrli anyqtamalardy úıip-tógip sandaltýdyń qajeti qansha? «Qytaıdan sottalmaǵanyń týraly anyqtama ákel, turǵylyqty orynnan esepten shyqqanyń týraly anyqtama kerek» degen sekildi aqymaq talaptardy qoıyp, qandastardy jylatyp jatyr. Al ondaı talap eshbir zańda kórsetilmegen. Muny toqtatýymyz kerek», - dedi T. Mamashev.