Dúnıejúzi qazaqtary qaýymdastyǵynyń kitaphanasy bıyl 7 kitappen tolyqty
ALMATY. 19 qarasha. QazAqparat /Erlik Erjanuly/ - Búgin Almatyda "Ádebıettiń áleýmettik mańyzdy túrlerin shyǵarý" baǵdarlamasy boıynsha sheteldegi qazaqtardyń avtorlyǵymen Dúnıejúzi qazaqtary qaýymdastyǵynyń "Atajurt" baspasynan jaryq kórgen jańa kitaptardyń tusaýkeseri ótti.
Qaýymdastyqtyń Tóralqa tóraǵasynyń birinshi orynbasary Talǵat Mamashevtyń aıtýynsha, Baılanys jáne aqparat mınıstrligi Aqparat jáne muraǵat komıtetiniń baǵdarlamasy boıynsha aǵymdaǵy jyly Qaýymdastyq kitaphanasy serııasymen memlekettik tapsyrys arqyly 7 kitap shyǵarylyp otyr. Olar "Ospan batyrdyń týǵanyna 110 jyl" ǵylymı konferentsııasynyń qorytyndysy retinde "Azattyqtyq óshpes rýhy" taqyrybyndaǵy baıandamalar jınaǵy. Qytaılyq aqyn-jazýshylardan Murat Shaımaranyń "Erkin aspan óleńi", Qaırolla Baıanbaıulynyń "Selkeýsiz sezimder" romany jáne Nurıla Qyzyhanqyzynyń "Ańshylyq hıkaıattary". Mońǵolııanyń 52 aqynynyń shyǵarmalary kirgen "Baıbesik tumalary" men Baıyt Qabanulynyń "Burymbıbi" jyr jınaqtary jáne Reseı qazaqtarynyń basynan keshkenderi týraly Dálelbek Batyrdyń "Tilep alǵan qasiret" hıkaıattar jınaǵy.
Sondaı-aq Reseı men Mońǵolııada jaryq kórgen basqa da kitaptar tanystyryldy. Olardyń ishinde mońǵolııalyq tarıhshy, professor Islama Qabyshulynyń "Turan álemi", Serikqalı Baımensheniń Máskeý qazaqtarynyń "Murager" qazaq mádenı ortalyǵynyń 20 jyldyǵyna arnalǵan "Murager" kitaby. Reseılik qalamger, qoǵam qaıratkeri Qalıl Qabdolýaqıtovtyń "Otkochevnıkı" jáne taǵy basqa da týyndylar bar.
