Dúnıe júzindegi qazaqtardyń baılanysyn nyǵaıtý úshin "QazAqparat" agenttigi bastaǵan jaqsy jumystar jalǵassa ıgi - delegat Asaı Rábish
ASTANA. 25 mamyr. QazAqparat /Qanat Mámetqazyuly/ - Dúnıe júzindegi qazaqtardyń baılanysyn nyǵaıtý úshin "QazAqparat" agenttigi bastaǵan jaqsy jumystar jalǵassa ıgi. Búgin Astanada bastalǵan Dúnıejúzi qazaqtarynyń IV Quryltaıynda sóz sóılegen Mońǵolııa Respýblıkasy Ulanbatyr qalasyndaǵy Qazaq mádenıet ortalyǵynyń basshysy, medıtsına ǵylymynyń doktory Asaı Rábish osylaı málim etti.
Óz sózinde Asaı Rábish myrza Quryltaıdyń qazaq ultynyń, kúlli qazaqstandyqtardyń bıik maqsat pen ortaq múddeler toǵysynda ótip otyrǵanyn atap ótti. Sonymen qatar, Qazaqstannyń Táýelsizdikten bergi jetken jetistikterine toqtala kele, mártebeli meıman, Atajurtta Elbasy N. Nazarbaevtyń basshylyǵynda atqarylyp jatqan sharalardyń el bedelin halyqarlyq arenada artyp otyrǵanyna da nazar aýdardy. «Bul árıne óte qýanyshty jáıt. Degenmen, endigi jerde shet eldegi aǵaıyndar da osyndaı deńgeıge jetýimiz kerek. Bul rette Mońǵolııadaǵy qazaqtarǵa da turaqty qoldaý men kómek kerek», - degen Asaı Rábish myrza birneshe naqty usynystaryn alǵa tartty.
«Buryn Mońǵolııaǵa Qazaqstannan gazet-jurnal, kitaptar men basqa da baspa ónimderi kóp jetkizilip turatyn. Qazir bul doǵaryldy. Mońǵolııada qazaq tilindegi gazet pen jurnaldyń jaryq kórýi qıyndap otyr. Qarjy tapshylyǵynan qazaq baspahanasy taratyldy. Endigi jerde ınternet quraldary engizgen "QazAqparat" agenttigi bastaǵan jaqsy jumystar jalǵassa durys bolar edi. QazAqparat qajetine qaraı dúnıejúzine latyn jáne arab árpimen jazylǵan qazaqsha tól aqparatty tarata bastady. Arabsha tóte jazýmen "Qazaq rýhanııaty" atty ádebı, mádenı jáne eltaný portalyn ashyp, syrttaǵy qazaqtar asa sýsap otyrǵan taqyryptardy kóterip, qazaq poezııasy men áńgimeleriniń antologııalaryn jasady. Qazaq tarıhy men shejiresine, ádebıeti men ónerine qatysty qundy materıaldar usynyp otyr. Bul bizdiń aqparattyq, ádebı-mádenı kópirimiz», - dedi meıman.
Esterińizge sala keteıik, búgingi alqaly quryltaıdy Memleket basshysy Nursultan Nazarbaev dúnıe júzindegi qazaqtardyń ózara baılanysyn nyǵaıta túsý úshin Baılanys jáne aqparat mınıstrligine arnaıy veb-saı ashýdy tapsyrǵan bolatyn. «Bizdiń shettegi óz qandastarymyzdyń Qazaqstannan jan-jaqty habar alyp turýyna kómektesýimiz qajet. Bul rette Baılanys jáne aqparat mınıstrligi «CaspioNet» arnasynyń habarlaryn qazaqtar turatyn elderge taratylýyn qamtamasyz etýi shart. Bul rette bizdiń ulttyq dástúrimiz ben salttarymyz týraly habarlardy arttyrýdy tapsyramyn. Buǵan qosa, mınıstrlik dúnıejúzindegi qazaqtarmen baılanysty nyǵaıta túsýi úshin arnaıy veb-portal ashqany jón»,-dedi Prezıdent.
