Dúnıe júzinde Qytaı qarýyna suranys artýda
Qytaı dúnıejúzilik qarý naryǵynda óz úlesin arttyrýda. Beıjińniń Túrkııaǵa 3,4 mlrd dollar turatyn zymyran keshenderin satýy týraly atyshýly kelisiminiń artynsha Qytaıdyń tek Reseıdi ǵana emes, sonymen qatar birqatar batys elderin yǵystyrýǵa ábden daıyn ekenin sarapshylar shyndap aıta bastady. Qytaıdyń ózi birneshe jyl buryn satyp alǵan joǵary tehnologııalar negizinde qarýdy belsendi eksporttaý faktisi erekshe qaýip týdyrady.
Stokgolm halyqaralyq dúnıejúzilik problemalardy zertteý ınstıtýtynyń (SIPRI) málimetteri boıynsha, Qytaıdyń qarý-jaraq eksportynyń kólemi 2008-2012 jyldar aralyǵynda 162% -ǵa ósken. Naryq kólemi boıynsha (5%) ol Ulybrıtanııany qýyp jetip, dúnıejúzinde besinshi orynǵa jaıǵasty. Al, 2003-2007 jyldary segizinshi orynda bolatyn. Sońǵy bes jyl ishinde Qytaı dúnıe júziniń 37 eline qarý-jaraq jetkizdi. Shet elderde Qytaıdyń 2009 jyly jasalǵan (2011 jyly satyla bastaǵan) Wing Loong ushqyshsyz ushaǵy óte tanymal bolyp otyr. Tutynýshylardy onyń Amerıka jáne Izraıldiń osyndaı ushqyshsyz ushaǵynan edáýir arzandyǵy qyzyqtyrady. Quny - 1 mln dollar.
Qytaı Reseıdiń ókshesin basyp keledi. «Qytaı, tipti, Reseı úshin basty naryq bolyp tabylatyn Venesýela, Aljır, Egıpet, Namıbııa, Sýdan, Indonezııa elderinde negizgi básekeleske aınaldy. Qytaı óniminiń arzandyǵy, birinshi kezekte, Bangladesh, Nıgerııa jáne Tanzanııa sııaqty kedeı elderi úshin mańyzdy bolyp otyr.
