«Dúnıe dıdaryndaǵy Dımash»: Ánshiniń týǵan jerindegi mýzeıde kórme ashyldy
AQTÓBE. KAZINFORM – Rýspýblıka kúni qarsańynda Aqtóbe oblystyq tarıhı-ólketaný mýzeıinde «Dúnıe dıdaryndaǵy Dımash» atty kórme ashyldy. Munda ánshi Dımash Qudaıbergenniń bala kúninde jatqan besigi, otbasynyń fotoalbomy men marapattaryn, ózge de eksponattardy tamashalaýǵa bolady.
Tanymal ánshiniń ár jyldary jetken jetistikteri men kontsertterindegi kıimderiniń bári kóptiń kóz aldyna shyǵaryldy. Barlyǵy 140-tan astam eksponat ákelindi.
– Dımash Qudaıbergenniń fanattary syılaǵan syılyqtar bir qanatty alyp tur. Olardyń arasynda túrli mýzykalyq aspaptar, kartınalar men qoldan jasalǵan buıymdar bar. Sonymen birge fotoalbomyn da kórýge bolady. Ár eldiń týy ilingen aǵash butalaryna qarap-aq ánshi tyńdarmandarynyń ondaǵan, tipti júzdegen elde bar ekenin bilemiz. Sonymen birge ataqty tulǵalar bergen syılyqtary da ákelindi, - dedi Aqtóbe oblystyq tarıhı-ólketaný mýzeıiniń kishi ǵylymı qyzmetkeri Aıman Taýman.
Mýzeıge kelýshiler akter Djekı Chan syıǵa tartqan kúrteni kóre alady. Bul 2017 jyly berilgen syılyq. Sonymen birge túriktiń mýzykalyq prodıýseri jáne dı-djeı Býrak Ieter syıǵa bergen kúrte de bar. Qazaq salt-dástúrine qyzyqqandar kórmeden at ábzelderin de tamashalaıdy.
– Dımash atqa minip, serýendegendi jaqsy kóredi. Ol – hobbıi. Kórmede er-toqym, qamshy, beldik, aýyzdyq bar. Ony áli kúnge deıin ózi tutynady, - dedi Aıman Taýman.
Kórmege búgin oblys ákimi Ashat Shaharov, óńirdiń qoǵam belsendileri men Dımash Qudaıbergenniń ata-anasy, ustazdary, týma-týystary keldi.
– Maqsatymyz ósip kele jatqan urpaqqa úlgi etý. Dımashtyń jeke zattarymen qosa belgili tulǵalardyń syılyqtary, kontsert kostıýmderi jınaqtalǵan. Osy arqyly árbir qazaqtyń balasy eńbektense, talaptansa úlken jetistikke jetýge bolatynyn kórsetkimiz keldi. Mektep oqýshysynan bastap kórip, umtylsa deımiz. Balalar teris ádettep aýlaq bolyp, jaqsy dúnıemen aılanyssa degen oıymyz bar. Aqtóbe oblystyq tarıhı-ólketaný mýzeıiniń orny erekshe. Bul bizdiń ósip-óngen, qasterli dúnıelerdi jınaqtap otyrǵan kıeli shańyraq. Sondyqtan bul jerde Dımashtyń qundy zattarynan arnaıy eksponat qaldyramyz degen oıymyz bar, - dedi Dımash Qudaıbergenniń atasy Svetlana Aıtbaeva.
Onyń aıtýynsha, Ulttyq mýzeıde bolǵan kórmeni bir aıda 15 myńǵa jýyq adam tamashalady. Onda sheteldikter kóp bolǵan.
– Ulttyq mýzeıden keıin Aqtóbe «biz alamyz» degende biz qýandyq. Sebebi árkimniń týǵan jeri, qutty mekeni ystyq. Qasıetti topyraqtan asqan eshteńe joq, - dedi Svetlana Aıtbaeva.
Eske salsaq, qyrkúıekte Astanadaǵy Qazaqstan Respýblıkasynyń Ulttyq mýzeıinde Qazaqstannyń halyq ártisi, kompozıtor jáne mýltıaspapshy Dımash Qudaıbergenniń shyǵarmashylyǵyna arnalǵan «Dúnıe dıdaryndaǵy Dımash» atty kórme ótti.
