Dýnaıdyń tartylýy saldarynan Rýmynııa jalǵyz AES-in toqtatty
ASTANA. KAZINFORM – Rýmynııa beısenbi kúni Dýnaı ózenindegi sý deńgeıiniń rekordtyq kórsetkishke deıin tómendeýine baılanysty eldegi jalǵyz atom elektr stantsııasynyń jumysyn tolyq toqtatty. Bul týraly VVS jazdy.
Nuclearelectrica ulttyq atom energetıkalyq kompanııasy shilde aıynda «Chernavode» AES-indegi eki reaktordyń birin toqtatqan edi. Bul stantsııa ádette Rýmynııada óndiriletin elektr energııasynyń besten bir bóligin qamtamasyz etedi.
Kompanııanyń málimdeýinshe, «Dýnaı ózenindegi sý deńgeıiniń aıtarlyqtaı ári úzdiksiz tómendeýine» baılanysty ekinshi reaktordy da toqtatýǵa týra kelgen.
– Nuclearelectrica SA 2026 jylǵy 13 tamyz tańerteń «Chernavode» atom elektr stantsııasynyń ekinshi energoblogyn baqylanatyn rejımde toqtatý rásimin bastady, – delingen kompanııa málimdemesinde.
Rýmynııa bıligi árqaısysynyń qýaty 700 MVt bolatyn eki reaktordyń da tolyq toqtap qalýyna jol bermeý úshin birneshe kún boıy áreket jasaǵan.
Osy maqsatta birqatar tótenshe shara qabyldandy. Atap aıtqanda, ózen arnasyn ózgertý úshin jartastar jarylyp, tas tıelgen tórt barja sýǵa batyrylǵan. Bul jumystardyń jalpy quny 2 mln eýrodan asty.
Bul – 2003 jylǵy qurǵaqshylyqtan beri stantsııanyń alǵash ret tolyq toqtaýy. Sol kezde de AES jumysyn birneshe aptaǵa toqtatýǵa týra kelgen.
Rýmynııa Energetıka mınıstrligi sársenbi kúni eldi elektr energııasymen qamtamasyz etý úshin balama kózder paıdalanylatynyn málimdedi. Olardyń qatarynda jel energetıkasy men elektr energııasynyń ımporty bar.
Rýmynııa tamyz aıynyń sońyna deıin energetıka salasynda tótenshe jaǵdaı jarııalady. Bılik kompanııalar men turǵyndardy keshki ýaqytta elektr jelisine júkteme sharyqtaıtyn kezeńde energııa tutynýdy erikti túrde azaıtýǵa shaqyrdy.
Energetıka mınıstrligi sondaı-aq qýaty 330 MVt bolatyn qońyr kómirmen jumys isteıtin elektr stantsııasyn iske qosty.
Elektr energııasynyń tapshylyǵyn óteý úshin mınıstrlik sý qoımalaryndaǵy sý deńgeıine qaraı jel jáne sý elektr stantsııalaryndaǵy óndiristi ulǵaıtýǵa da úmit artyp otyr.
Aıta keteıik, ótken aptada Rýmynııa AES jumysyn saqtaý úshin Dýnaıdaǵy jartasty jarǵan edi.
Al Aptap ystyqtap Frantsııadaǵy AES-ter qýatynyń besten biri isten shyqty. Sondaı-aq buǵan deıin Frantsııadaǵy aptap ystyqqa baılanysty atom reaktorlary ýaqytsha toqtatylǵanyn jazdyq.
Budan bólek, aptap ystyqtan Frantsııada segiz ıadrolyq reaktordyń qýaty tómendetilgeni habarlandy.
