Dýnaı sýy tartylyp, Majarstandaǵy jalǵyz atom stantsııasy jumysyn toqtatty
ASTANA. KAZINFORM — Majarstan 44 jylda alǵash ret eldegi jalǵyz atom elektr stantsııasy — «Paksh» AES-iniń jumysyn toqtatady. Buǵan Dýnaı ózenindegi sý deńgeıiniń rekordtyq tómendeýi sebep boldy. Bul týraly Deutsche Welle jazdy.
AES-ti ýaqytsha toqtatý týraly Vengrııa premer-mınıstri Peter Madıar málimdedi. Onyń aıtýynsha, buǵan reaktorlardy salqyndatý úshin paıdalanylatyn Dýnaıdaǵy sý deńgeıiniń buryn-sońdy bolmaǵan deńgeıde tómendeýi sebep bolǵan.
«Paksh» AES-i Majarstandaǵy barlyq elektr energııasy óndirisiniń shamamen jartysyn qamtamasyz etedi. Elektr tapshylyǵy bolýy múmkin degen qaýipke baılanysty bılik turǵyndar men kásipkerlerdi energııa tutynýdy azaıtýǵa úndedi.
Buǵan deıin el úkimeti tótenshe jospar ázirlegen edi. Ol ónerkásiptik kásiporyndardaǵy elektr tutynýdy kezekpen shekteýdi qarastyrady. Sonymen qatar basqa elektr stantsııalary óndiris kólemin ýaqytsha arttyrýǵa tıis.
DW málimetinshe, Ortalyq Eýropadaǵy aptap ystyq pen qurǵaqshylyq Dýnaı ózeniniń tek Majarstanda ǵana emes, kórshiles elderde de qatty tartylýyna ákelgen. Shilde aıynyń sońynda Rýmynııadaǵy «Chernavode» AES-iniń alǵashqy energoblogy toqtatyldy. Al Serbııada sý deńgeıiniń tómendeýine baılanysty avtonomdy Voevodına ólkesiniń soltústik bóligin sýmen qamtamasyz etetin sorǵy stantsııasy jumysyn toqtatty.
